SAIS anyos pa lang si Rosette Pagpaguitan dihang ibtan unta siya og ngipon apan tungod kay mas nanglabaw ang iyang kahadlok, wa kini madayon.
Ang iyang kasinatian mao ang nagdasig kaniya nga magdamgo nga mahimong dentista.
Natuman kini ug gipakapinan pa.
Si Pagpaguitan, tinun-an sa Southwestern University, ang nanghawod sa labing uwahi nga Dentist Licensure Examination diin iyang nakuha niini ang top 1 sa grado nga 84.40.
Second place usab ang iyang classmate nga si Lloyd Nacua sa grado nga 83.23.
Lakip nga nakasulod sa top 10 ang tinun-an sa Cebu Doctors University nga si Rogin Liza sa 7th place sa grado nga 82.90.
Si Pagpaguitan, kinsa kamanghuran sa unom ka mga managsuon, nibutyag nga silang tanan managsuon mga medical professional.
Iyang giisip nga inspirasyon ang iyang mga ginikanan nga maoy nagsuporta sa iyang pagtungha.
Lumad sa Bontoc, Southern Leyte ang 24-anyos kinsa migraduwar nga Cum Laude niadtong Marso 2015.
Nigradwar sa elementarya nga valedictorian ug salutatorian sa high school.
Ang hugot nga pagtuo usab sa Ginuo mao ang nahimong niyang giya aron molampos siya sa iyang pagtuon isip dentista.
“Pero wala gyud ko nangayo sa Ginuo ba nga ipa-top. Ang ako kay makapasar lang gyud,” human siya nisaysay sa kalisod sa maong exam.
Martes sa gabii dihang nakahibawo siya sa resulta samtang didto pa siya sulod sa simbahan nitambong og misa dungan sa pasalamat sa grasya nga gihatag kaniya sa Ginuo.
Wa pay konkreto nga plano si Pagpaguitan sa iyang gustong buhaton human niya masungkit ang iyang lisensya.
Apan matod niya nga mamahimo nga mag-associate usa siya sa mga dental clinic.
Tambag niya sa mamahimong dentista nga “enjoy the process lang jud, do not overdo or dili i-overwork ang ilang self, dili pa stress kaayo. Study hard, pray harder.”
Gisuwayan ning mantalaan nga kuhaan og habig ang dean sa SWU apan wa siya motubag sa tawag.
Gibutyag ni Pagpaguitan nga nikontak na niya ang tunghaan alang sa usa ka courtesy call.
Gi-anunsiyo sa Professional Regulation Commission (PRC) nga 446 ang nakapasar sa maong exam diin 900 ang nikuha sa 2015 December Dentist Licensure Exam.