NILUTAW nga kampyeon si National Master Rustum Tolentino human maangkon ang taas nga tie-break aron angkonon ang titulo sa 3rd Barangay Tablon Open Chess Tournament niadtong Dominggo sa Tablon covered court.
Nahuman si Tolentino unom ka puntos parehas nilang Johnnel Balquin ug Allan Cantonjos paghuman sa kataposang pito ka round sa Swiss System Format.
Apan, gideklarar si Tolentino nga mao ang kampyeon human milabaw siya og 1.5 punto sa tie-break batok sa nagsunod nga si Balquin, kinsa miuwi sa ika-duha nga pwesto, samtang si Cantonjos sa ika-tulo.
Kinalisod nga naagian ni Toletino sa torneyo mao ang dula niya batok kang Nazario Ubanan sa ika-tulong round.
Alkanse si Tolentino og duha ka pawn kang Ubanan sa usa ka Slav defense nga dula, apan kompyansa napadaog niya sa endgame.
“Mao to’ ang tsada nga dula ni Tolentino,” obserbar ni Elias Balase, kinsa usa sa manunula sa torneyo.
Ang duha ka table niya naggumikan sa iyang dula kang Balquin sa ika-lima nga round ug kang Basilio Pandan sa kataposang round.
Niuli si Tolentino og P12,000 cash prize, samtang sila Balquin ug Cantojos nibitbit sa P10,000 ug P7,000 alang sa ika-duha ug ika-tulo nga cash prize.
Nagkompleto sa ika-upat paingon sa ikanapulo, sunod-sunod, mao sila Pandan, Jones Maghuyop, Ubanan, Arbie Jims Calido, Jeriel Manlimbana, Mario Arroyo, ug NM Levi Mercado.