AKO si Michael, 28, nagpuyo denhi sa Bayabas, Cagayan de Oro.
Bout nakong i-share ang akong kasinatian sa gugma aron makat-onan sa tanan.
In short 'Mike akong pangalan ug usa ko ka lalaki nga tamili kaayo sa babae. Hinawayon sab kaayo ko sa mga babae nga sa panan-aw nako dili gwapa.
Tungod pod lage kay hinatagan man sa Ginoo og maayo nga hitsura hinungdan alang kanako sayon ra kanako manaway sa unsa man akong makita.
Naay usa ka babae nga si Jaze, tsada siya og pangalan apan nakasulti ko nga dili bagay sa iyang hitsura. Dili siya gwapa sa akong panan-aw. Matingala bitaw ko kay usa nako ka brod moingon nga cute kaayo si Jaze sa iyang panan-aw. Maora ko og kasukaon ug magkatawa sa iyang pagdayeg kang Jaze.
Apan akong na-classmate si Jaze ug didto nako naila pag-ayo. Sa kada-adlaw namong kita sulod sa classroom naay something unique nga akong nakita kaniya. Friendly kaayo siya nako mao gakakonsensya ko sa akong mga pagsaway niya kaniadto. Sa sige nako og tutok sa iyang nawong didto nako na prove nga insakto akong brod nga cute kaayo siya og mga mata, ilong ug labina ang lips.
Hinay hinay aduna koy nabati nga gugma kaniya ug dili ko pakatulog sa sige og huna-huna. Dili ko gusto mosulti sa akong brod kay basin unya kantyawan ko mao nga gipugos akong kaugalingon nga walaon. Apan samtang sige nako siya makita mas mosamot aknog pagbati.
Apan dihang migraduate si Jaze migawas kini sa nasod ug didto nanarbaho sa Amerika. Naningkamot sab ko sa akong kaugalingon nga makatrabaho denhi sa Cdeo. Kalouy sa Diyos nakaposisyon ko og taas sa usa ka hotel denhi sa Cdeo.
Usa ka higayon miuli si Jaze gikan America, gwapa na kaayo sa akong panan-aw dili lang cute. Hamis kaayo og panit ug labihan gyod akong gibati kaniya. Nisamot pag-ayo.
Sa pagkita namo gikuha ko gyod iyang numero deretso ug didto nagsugod among panagtext. Nibalik pa siya Amerika ug padayon among komunikasyon pinaagi sa facebook, facetime ug viber. Nagkasoud mi hangtod miabot sa punto midiskarte nako niya.
Pila pa ka bulan ang nilabay ug gisugot ko ni Jaze ug nagkauyab mi. Nahibaw-an nako nga bata pa daw mi duha naa na siyay pagbati kanako apan wala lang niya gipakita kanako kay maulit siya sa akong ka hinawayon.
Karong panahona gikatakdang moapas ko ni Jaze sa America aron mag-uban nami kanunay.