SIRHAN ang usa ka lane sa karaang taytayan sa Mactan aron paghatag og agianan sa mga delegado sa International Eucharistic Congress nga mopahigayon og Jericho Walk.
Sa Enero 28, Huwebes, ang left lane sa tulay nga manukad sa Lapu-Lapu paingon sa Mandaue sirhan.
Gipahibawo sa hepe sa City Traffic Management System (CTMS) Frank Brazil nga sirhan ang usa ka lane sa bridge 3 p.m. kay 4 p.m. himuon ang IEC Youth Pilgrim Walk nga manukad sa Hoops Dome paingon sa Mandani Bay.
Matod ni Brazil, gibana-bana nga sulod sa lima ka oras ang pagpatuman sa road closure sa pagkompleto sa pilgrim walk sa gibana-bana 3,200 ka mga delegado nga mosalmot.
Sa Enero 26, sirhan ang karsada atubangan sa Mactan Parish Church 3 p.m. gumikan sa ipahigayon nga tourism activity sa maong dapit.
Sa Cebu City, tungod kay aduna’y mga dalan nga sirhan, nipahibawo ang Cebu City Traffic Office (CCTO) nga aduna’y car passes kun sticker ang ipanghatag aron aduna’y pili nga mga sakyanan nga makasulod sa gisirado nga dan.
Matod ni CCTO executive director Rafel Yap, mamahimo silang mokuha niini sa buhatan sa Archdiocese of Cebu.
Gi-turn over na sa CCTO ang passes sa Archdiocese aron sila na ang mohatag niini sa mga tag-iya og sakyanan nga angayan hatagan.
Lakip sa hatagan kadtong balay kun pamilya nga anaa sa apektado nga rota susama sa Pope John Paul II Avenue.
Matod ni Yap nga lain-lain ang sticker matag aktibidad aron masigurado usab nila ang siguridad sa mga motambong sa kalihokan ug aron paglikay sa kahuot sa trapiko.
Aduna’y control number ang matag pass aron masuta ang gidaghanon sa gihatagan niini.
Unang hatagan ang kadtong mga sakyanan sa mga delegado ingon man kadtong obispo ug kaparian.
Gisugdan na kagahapon ang tulo ka adlaw nga pre-congress Theological Symposium sa Cebu Doctor’s University.