SULIYAW ug pakpak ang madungog samtang nag-aginod ang duha ka float sa MLhuillier Kwarta Padala sa rota sa Sinulog Grand Parade niadtong Dominggo. Ang unang float nga apil sa bangga naghulagway sa talan-awon ilawom sa dagat diin ang usa ka tuki o butanding nagbuntaug sa ibabaw nga bahin.
Gisuliyawan ang ikaduhang float diin nagtungtong ang magtiayong endorsers nga sila si Melai Cantiveros ug Jason Francisco. Gipakpakan usab si Ogie Alcasid pero di siya pirmeng mamatikdan kay usahay mobalhin kini sa luyo.
Nakadayeg pag-ayo ang promo diva nga si Josie Pereyra sa energy ni Melai ug Jason nga way puas ang pagpasi-aw ug pagsayaw sukad sa buntag hangtud nahapon na lang.
Sa gipakita nga gimik sa duha ug ang maayong pagdawat niini sa mga tawo, lagmit sila gihapon ang kuhaon sa MLhuillier sa sunod Sinulog.
***
Wa mosalir ang akong power sa pagtag-an sa modaug sa 36th Cebu Popular Music Festival niadtong Biyernes. Ang napili nga labing nindot nga kanta sa Inspirational, Love Song ug Environmental categories mao ang Ngano Kaha, Awit Ning Gugma ug Manguros Na Lang Tang Daan.
Si Mariel Minglanilla nga nikanta sa Ngano Kaha ang napiling best interpreter. Mga pahalipay!
Kini si Mariel nakaapil sa Halad sa Kabataan nga proyekto sa Lalawigan sa Sugbo kada saulog sa Children’s Month. Laing produkto sa Halad, si Jared Roble III, napili usab nga Sinulog Idol 2016 niadtong Huwebes. Bongga!
Mga runners-up ni Jared sila si Kenjie Exaltacion ug Nina Naputo. Mga pahalipay na sab!
***
Nakugang ko pagkadungog kang Selina Sevilla nga nising-al og “Langit ug Yuta” isip guest performer sa Cebupop. Tagalog man god kini si Selina pero matud pa niya, na-in love siya sa mga awit nga Bisaya kay puno sa pagbati ug kinabuhi. Magtuon pa kuno siyag dugang pang mga Bisayang awit. Maayo hinoon!
Si Selina ug Lalen Calayan ang nagdumala sa Calayan Medical Clinic sa Oakridge Business Center sa Mandaue City nga nipaluyo sa Cebupop ug Sinulog Idol.
Si Pilita Corrales nga maoy pinasidunggang dinapit nikantag lima: Matud Nila, Usahay, A Million Thanks, Besame Mucho ug usa ka kantang Tagalog.
Naa gihapon ang iyang pagbawogbawog sa lawas ug pagsul-ob og sayal nga taas kaayog slit. Puti man sab god iyang paa ug bitiis mao nga carry ra.
***
Kon nagsakit na inyong dunggan sa katalinis sa tingog sa mga biritira, niay palahi. Si Lilac Cana, usa ka opera singer, magkonserto karong gabii sa Grand Convention Center.
Didto nagdako si Lilac sa Toronto, Canada, nakahimo nag pito ka CD albums ug nakadawat nag daghang awards. Labing halandumon alang niya ang pagkanta niya atubangan ni anhing Sto. Papa John Paul II sa 2002 World Youth Day ug niaging Sto. Papa Benedict XVI sa pagkanonisar ni San Pedro Calungsod niadtong 2012.
***
Pahiyom ug pasalamat ang gisukli ni Vilma Santos sa mga pagdayeg ni Angel Locsin ug Xian Lim sa iyang pagka maayong tawo ug artista. Nahitabo kini sa Tonight with Boy Abunda karong semanaha.
Ang tulo magkauban sa pelikulang Everything About Her nga hinimo sa Star Cinema ug isalida na sugod sa Miyerkules, Enero 27.