NABALAKA si Department of Interior and Local Government Secretary Mel Sarmiento sa mamahimong mahitabo sa kabataan nga mga partisipante sa Youth Day sa 51st International Eucharistic Congress karong Huwebes sa kanunay nga pag-uwan sa Sugbo.
Si Sarmiento miari sa Sugbo kagahapon aron pagsusi sa mga dapit nga pahigayunan sa mga kalihukan sa IEC.
Usa sa iyang gisusi mao ang Mandani Bay sa dakbayan sa Mandaue diin ipahigayon ang Youth Day sa Enero 28-29.
Gibanabanang 5,000 ka mga batan-on gikan sa ubang bahin sa nasod ug ubang kanasuran ang moapil sa Youth Day nga manukad sa dakbayan sa Lapu-Lapu.
Ang mga delegado mosalmot sa Youth Pilgrim Walk gikan sa Lapu-Lapu ngadto sa Mandani Bay sa Mandaue.
Sirhan nianang alas 2 sa hapon sa Huwebes gikan sa trapiko ang katunga nga lane sa karaang Mactan Bridge.
Kadtong mga sakyanan nga mopaingon sa dakbayan sa Lapu-Lapu adto paagion sa Marcelo Fernan bridge.
Si Sarmiento niingon nga di “ideal” ang lugar nga pahigayonan sa Youth Day sa Mandaue tungod sa kanunay nga pag-uwan ilabi na basa kini ug dunay gipahimutang nga mga ekipo sa dapit.
Nabalaka siya sa mga ekipo nga dunay nagkutay nga mga linya sa kuryente.
Sayo og lakaw
Samtang giawhag ni Glenn Antigua, pangu sa Traffic Enforcement Agency of Mandaue (Team) ang mga biyahedor nga moagi sa Mactan Cebu International Airport (MCIA) sa pagsayo aron di sila matanggong sa trapiko ugmang adlawa.
Ang katunga nga lane sa unang Mactan bridge sirhan na gikan sa mga sakyanan nga magagikan sa dakbayan sa Mandaue sa alas 2 sa hapon ngadto sa alas 6 sa gabii.
Ang mga delegado sa Youth Day, usa sa mga kalihukan sa IEC, motadlas sa taytayan sa mga alas 4 sa hapon gikan sa dakbayan sa Lapu-Lapu.
Mga sakyanan nga gikan sa Mandaue City paingon sa dakbayan sa Lapu-Lapu ilang paagion sa S.B. Cabahug o M.C. Briones st. paingon sa Marcelo Fernan bridge.
Mga traffic sign ilang ipamutang sa mga karsada aron mogiya sa mga motorista.
Si Frank Brazil, pangu sa City Traffic Management System (CTMS) sa Lapu-Lapu City, niklaro nga ang duha ka lanes sa Marcelo Fernan bridge magamit sa mga motorista nga mopaingon ug mogawas sa Lapu-Lapu City.
Apan kini ma-busy tungod sa pagsira sa usa ka lane sa first bridge hinungdan nga mas maayong mosayo pagbiyahe ang mga biyahidor nga moagi sa airport.
Kapin sa 200 ka mga pulis ang ipakatap sa Mandaue City Police Office (MCPO) aron moabag sa kahapsay ug kalinaw sa mao nga kalihukan.
Nakauyon
Si Sarmiento gipadala ni Presidente Benigno Aquino III aron maoy mosusi sa seguridad nga gipatuman sa mga awtoridad sa pagsugod sa mga kalihukan sa 51st IEC niadtong Dominggo hangtod sa katapusang adlaw o ang pagpahigayon sa Statio Orbis sa South Road Properties karong umaabot Dominggo.
Nakauyon siya sa giandam ug gipatuman nga seguridad.
Siya nibutyag nga moanhi usab si Philippine National Police Chief Director General Ricardo Marquez sa Sugbo aron motabang usab og susi sa seguridad nga giandam sa iyang mga sakop alang sa katapusang misa sa SRP.
Kagahapon, iya usab nga gisusi ang SRP diin ipahigayon ang Statio Orbis karong Dominggo.
Nagpasalamat si Sarmiento nga gihatagan og lugar ang kapulisan aron mas ma-monitor nila ang dapit.
Matod ni Sarmiento dako og natabang sa pagpangandam sa seguridad ang ilang mga nakat-onan sa gipahigayon nga Asia Pacific Economic Cooperation (Apec) dinhi sa Sugbo.
Sa iyang pagtuyok sa IEC Pavilion, nakauyon siya sa gipatuman nga seguridad.
“Nakita ko handang handa ang ating gobiyerno kasama na rin ang organizers. Ito ang bunga kapag nagtutulungan ang pribadong sector at kasama na rin ang gobiyerno, nagtutulungan sa mga activity na ganito na napakalaki at kailangan maseguro natin ang seguridad at safety ng lahat,” dugang sa kalihim.