NIPANAW na si Philippine basketball legend Caloy Loyzaga sa edad nga 85 kagahapon sa buntag.
Si Loyzaga kinsa naila isip “The Great Difference” gipasidunggan ni Veteran sportscaster Chino Trinidad sa iyang facebook post, “Today I say goodbye and thank you for the man who taught me how it is to truly play for flag and country.” Napatik kini sa InterAksyon.com.
Pipila usab ka media outlets ang nipahibalo sa kamatayon sa Philippine basketball legend.
Gibituonan ni Loyzaga ang Philippine basketball niadtong 1950s hangtod 1960s diin iyang gitabangan ang nasod sa pagkab-ot og upat ka sunod-sunod nga gold medals sa Asian Games niadtong 1951 hangtod 1962.
Sulod sab sa duha ka mga higayon naagak ni Loyzaga ang Philippine basketball aron makasulod sa Olympics niadtong 1952 ug 1956.
Iya usab gipangulohan ang mga Pinoy sa bronze medal finish niadtong 1954 FIBA World Championship diin nagpabilin karon isip labing dakong kalampusan sa usa ka Asian team sa maong panagsangka.
Si Loyzaga, kinsa alumnus sa San Beda, nahimo nga coach sa UST Growling Tigers sa UAAP, U/Tex ug Tanduay atol sa iyang sayong katuigan sa PBA.
Adunay siya’y upat ka mga anak, duha niini mga lalaki nga sila si Chito ug Joey nga nisunod paghimo og career sa basketball ug sila’ng Teresa ug Bing nga pulos nahimong mga artista.
Sa tribute alang kang Loyzaga nga gipagawas sa Interaksyon.com tulo na ka mga tuig ang nilabay, si kanhi senator Rene Saguisag nidayig kaniya isip “the best basketball player the country has ever produced.”
“He stood at 6-foot-3 at a time when some centers would not even be six-footers. He was not the only 6-foot-3 guy then but he stood out because of his high BQ — basketball quotient. He used his gift, his talent, to the utmost, as the Bible mandates,” batbat ni Saguisag kabahin kang Loyzaga niadtong 2012.
“Caloy is simply the best basketball player our country has ever seen. Truly big time, the Big Difference, in basketball,” dugang ni Saguisag. Kristine Caballes, USJ-R Comm Intern