Pilgrim Walk sa Lapu-Mandaue gi-cancel

GIKANSELAR sa mga organizer sa International Eucharistic Congress (IEC) ang Pilgrim Walk nga manukad sa Hoops Dome, Lapu-Lapu City paingon sa Mandani Bay, Mandaue City karong hapon.

Inay anha na lang kini ipahigayon sa Lapu-Lapu City nga mubo ang rota.

Ang mga organizer nakahukom niini tu­ngod sa di maayong panahon nga kuyaw sa pag­lakaw, kalapok sa dapit ug kakuwang sa mapasilongan sa mga delegado.

Gumikan niini, ang duha ka mga lane sa unang Mactan bridge bukas na alang sa trapiko.

Wa nay rerouting sa mga sakyanan sa Lapu-Lapu City ug Mandaue City.

Nahukman sa grupo ni Fr. Kit Sestoso, nangulo sa youth activities, nga di ihinayon ang Pilgrim Walk lagbas sa duha ka mga dakbayan sa kabalaka sa da­ngatan sa liboan ka mga delegado, ilabi na nga way undang ang pag- uwan.

Si Gilbert Ang, project director sa Mandani Bay, niingon nga nakasabot siya sa tumong sa organizers.

Uyon si Lapu-Lapu City Mayor Paz Radaza sa hangyo sa organizer nga mogamit sa Hoops Dome alang sa overnight vigil sanglit kini maka-accommodate sa kapin sa 5,000 ka mga partisipante.

Usa sa nakitang sitwasyon sa hawanan sa Mandani Bay mao ang pagkalapukon gumikan sa pipila na ka adlaw nga pag-uwan-uwan ug di paigo ang tulda.

Ning mao nga kalamboan, ang mga facility sama sa portable toilets ug tents nga gamiton sa concessionaires ug stage lights gibalhin sa Hoops Dome.

Gipahibawo ni Frank Brazil, hepe sa City Traffic Management System (CTMS), nga abli ang duha ka mga lane sa Mactan Bridge ug way road closure nga ipatuman sa mga karsada sa Lapu-Lapu diin himuon ang Pilgrim Walk.

Mao usab kini ang gipahibawo ni Frank Brazil sa Traffic Enforcement Agency of Mandaue (Team).

Ang rota sa prosesyon manukad sa Hoops Dome gawas sa M. Patalinjug Avenue gamit sa lane nga mo-counter flow sa traffic.

Inig abot sa crossing sa tiilan sa first bridge, mo-left turn sa M.L. Quezon Highway lahos sa G.Y. dela Serna, left-turn sa Radaza Plaza subay sa S. Osmeña street balik sa Hoops Dome.

Kini dunay gibana-bana nga 3.5 kilometers nga gilay-on ug kapin sa 25 ka mga traffic enforcer ang ipakatap alang sa pagdumala sa trapiko, samtang ang karsada atubangan sa Hoops Dome maoy sirhan sang­lit magsilbi kining converging area.

Si Engr. Sharon Baguio, tagdumala sa Hoops Dome, nibutyag nga ilang gibuksan ang dul-an sa 10 ka mga lawak sa facility alang sa mga delegado ilabi na sa buot mopahuway atol sa ilang overnight vigil.

Nipasalig si Baguio nga adunay back-up generator ang Hoops Dome sa higayon nga adunay brownout nga makasustiner sa mga suga, sound system ug air conditioners.

Giandam usab ang shower area sa back stage ug portalets aron pag-augment sa kahimanan nga giandam nang daan sa organizers.

Atol niining pagsuwat ang lima ka mga parokya sa Lapu-Lapu nga naglangkob sa Virgen dela Regla, Babag, Pajac, Marigondon ug Mactan padayon nga nang-rehistro sa delegates.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph