NAGLAGITING ang kainit sa adlaw sa pagbukas sa ika-51 nga International Eucharistic Congress (IEC) dinhi sa Sugbo niadtong Dominggo, Enero 24, nga nasinati niadtong sayong miadto sa Plaza Independencia aron pagtambong sa opening mass.
Ang kainit sa adlaw nasinati sab sa representante ni Pope Francis, si Arsobipo Charles Maung Cardinal Bo sa Yangon, Myanmar, nga niingon nga sama kini sa kainit sa pagdawat kaniya sa mga Sugbuanon. Gani, nagpasiaw pa siya pinaagi sa pag-ingon, “Init kaayo ang buwan sa Cebu.”
Pero lagi, kon init kaayo ang adlaw, mag-ampo man tang mag-uwan aron sab mobugnaw ang hangin. Daghan tingaling nag-ampo nga nag-uwan mao nga nagsigig uwan gikan niadtong Lunes sa buntag hangtod sa Huwebes sa buntag.
***
Ang pagsigig uwan nakapabalaka sa mga organizers sa Youth Day sa IEC nga gikatakda kagahapon, sila si Fr. Kit Sestoso ug Fr. Mark Barneso. Mokabat sa 5,000 ka mga batan-ong delegado mosalmot sa Pilgrim Walk gikan sa Hoopsdome sa syudad sa Lapu-Lapu, subay sa unang Mandaue-Mactan bridge paingon sa Mandani Bay sa syudad sa Mandaue sugod unta sa alas 4 sa hapon kagahapon. Adto unta sila mag-vigil sa Mandani Bay hangtod sa alas otso karong buntaga.
Nakahukom ang mga organizer sa Youth Day nga kanselahon ang Pilgrim Walk paingon sa Mandaue tungod kay lapok kaayo ang Mandani Bay tungod sa siging uwan. Unya, way igong mga tulda nga kapasilongan sa 5,000 ka mga delegado kon magpadayon ang uwan.
Apan lagi kon mag-uwan, daghan sang mag-ampo nga moinit. Mao tingali nga kagahapon sa udto nisugod pag-iway ang mabagang panganod ug midan-ag pagbalik ang kahayag sa adlaw. Pero kanselado na ang Pilgrim Walk ug ang vigil sa mga batan-on adto na lang ipahigayon sa Hoopsdome sa syudad sa Lapu-Lapu.
***
Ang nagpabiling suliran sa mga IEC organizers mao ang gikatakdang Statio Orbis nga maoy magtak-op sa IEC karong Dominggo didto sa South Road Properties (SRP) nga gipaabot nga tambongan sa kapin sa usa ka milyon ka mga tawo. Adto kini sa samang venue sa thanksgiving mass sa canonization ni San Pedro Calungsod niadtong Nobyembre sa 2012 nga gitambongan sab kapin sa usa ka milyon ka mga tawo.
Gilunopan ang maong dapit tungod sa sigig uwan. Si Msgr. Joseph Tan, executive secretary sa 51st IEC Communication Department, niingon nga duna na silay mga alternative venues alang niini.
Matod pa ni Tan, dunay nisugyot nga buhaton ang gibuhat sa mga taga Tacloban sa pagbisita ni Pope Francis sa miaging tuig samtang dunay nagsingabot nga bagyo - ipadayon ang misa sa SRP, “rain or shine.” Taym pa, basin nakalimot silag halad og mga itlog sa mga madre.