IPADAYON gihapon sa mga organizer sa 51st International Eucharistic Congress ang pagpahigayon sa Statio Orbis sa South Road Properties karong Dominggo bisan sa hulga sa uwan, matod ni Cebu Archbishop Jose Palma.
Ang arsobispo nagkanayon bisan og gikonsiderar ang pagbalhin sa katapusang misa sa laing lugar, magpadayon gihapon ang Statio Orbis sa SRP.
Siya niingon nga mangita sila og paagi aron kini mauga. “Among ipadayon ang orihinal nga plano sa SRP,” matod ni Palma.
Si Palma nipasabot nga way laing lugar nga susama og gidak-on sa SRP diin masulod ang libuan ka mga tawo nga motambong sa misa.
Ang mga organizer sa 51st IEC nanghinaut nga moabot ngadto sa usa ka milyon ka mga tawo ang motambong sa Statio Orbis labi na gipakansilar na ni Palma ang tanang mga misa sa mga parokya ubos sa artsidyosesis sa Sugbo sugod ala 1 sa hapon.
Suma ni Palma, nikonsulta na sila sa Philippine Atmospheric, Geophysical and Astronomical Services Administration (PAGASA), ug giingnan sila nga maayo na ang panahon nga masinati inig ka Dominggo.
Apan ang forecast sa website sa Pagasa kagahapon sa mga alas 5 sa hapon nagpakita sa uwanon nga panahon sa Dominggo dinhi sa Sugbo.
Kon mag-uwan, ang arsobispo nitambag sa mga delegado nga magsul-ob og raincoat o ubang sagang sa uwan ug kon di sila gusto malubog sa lapuk, di magsul-ob og sapatos.
Giandaman
Matod ni Palma nga ang mga delegado gihatagan na og jackets nga anaa sud sa kits nga gipanghatag ngadto nila sa pagsugod sa IEC.
Siya nidugang nga kon nabalaka ang mga delegado sa ilang panglawas, mahimo sila di motambong sa closing mass.
Apan, si Palma nipahinumdum sa mga Sugbuanon ug bisan sa mga delegado nga bisan gani si Pope Francis nakapahigayon og misa sa Tacloban bisan og bagyo, atol sa pagbisita niini sa niaging tuig.
“Bisan sa Tacloban, ang mga tawo wa mangahadlok sa bagyo, di sab ta mahadlok sa lapok,” matod ni Palma.
Si Cebu City Acting Mayor Edgardo Labella, sa iyang bahin, niawhag sa pipila ka mga departamento sa City Hall nga andamon kutob sa mahimo ang SRP.
Kon gikinahanglan nga mogamit og mga makina aron pasuyopan og tubig, kini pagahimuon aron di magbiaw sa dapit.
Ang hugonhugon sa pagbalhin unta nahitabo human gikanselar sa organizers sa Pilgrim Walk ang kalihukan nga molagbas unta sa mga siyudad sa Lapu-Lapu ug Mandaue tungod sa uwan.
Ang kalihukan gibalhin gikan sa Mandani Bay sa Mandaue City ngadto sa Hoops Dome sa dakbayan sa Lapu-Lapu.
Samtang si Sr. Supt Rey Lyndon Lawas sa Police Regional Office (PRO) 7, niingon nga lakip sa ilang gipangandaman mao ang pagbunok sa uwan.
Andam usab gihapon sila bisan kon balhinon ang venue sa katapusang misa nga magtak-op sa IEC.
Di sila maglisod sa adjustment kay mahimo rang ipatawag ang security supervisors ug mga opisyal sa IEC.
SRP di pasudlan
Sa alas 12 sa udto sa Dominggo, tak-upan na sa Cebu City Transportation Office (CCTO) ang SRP gikan sa mga sakyanan.
Apan kon mapuno na sa mga tawo ug sakyanan ang parking areas sa dapit bisan sayo pa, di na sila magpaabot og udto, matod ni CCTO executive director Rey Gealon.
Ang mga sakyanan nga gikan sa southern Cebu mahimong makaparada sa lugar sa Kasadya sa Sugbo samtang sa north anha sa Citizen’s Park likod sa city hall.
Si SRP manager Rober “Bu” Vasquez niingon nga mopagawas sila og 15 ka mga bus aron mohakot sa publiko ngadto sa San Pedro Calungsod Shrine.
Magpabiling sirhan ang SRP gikan sa mga sakyanan hangtod nga mahawan na ang mga tawo sa dapit.
Sirhan ang eskina N. Bacalso avenue ug F. Llamas ug eskina V. Rama avenue ug N. Bacalso, 30 minutos sa di pa mahuman ang misa.
Ang mga sakyanan nga gikan sa south nga mopaingon sa siyudad sa Sugbo adto moliko sa F. Llamas ug mogawas sa Duterte st., ug Tres de Abril sa Labangon lahos sa laing bahin sa N. Bacalso ave.
Ang mga sakyanan nga gikan sa norte pai ngon ug south makaagi sa Katipunan st., ug V. Rama nga molapos paingon sa Duterte st.
Sirado usab ang dalan sa C. Padilla nga mopaingon sa south ug norte.