MATAPOS na ugma ang usa ka semana nga pagpahigayon sa 51st International Eucharistic Congress dinhi sa Sugbo. Usa ka semana nga mahulagway nato nga kulbahinam kaayo ilabi na sa aspeto sa seguridad. Kulbahinam alang sa mga organizers tungod sa pag-usab-usab sa dagan sa panahon. Murag bag-o pa sa akong panumduman kadtong site visit sa IEC Cebu Pavilion sa niaging tuig. Daw di pa dugay ang mga press briefing nga akong gitambongan labot sa mga preparasyon nga gihimo sa mga organizers. Ang dry run sa mga bus nga gi-supervise ni Bishop Dennis Villarojo daw kagahapon ra. Ang presscon sa PNP labot sa siguridad nga gusto nilang ipatuman lab-as pa kaayo sa akong panumduman. Usa ka international event nga taudtaud na nga gipangandaman matapos na ugma. Kudos sa tanan nga nakatampo sa kalampusan ning talagsaon nga kalihukan. Madako o magamay man ang imong natampo apil na kadtong nitunol sa ilang pagsabot sa nahimong epekto niini daghan kaayong salamat. Hangtod sa sunod nga IEC.
Youth
Ang katapusang bahin sa programa sa IEC Youth Day maoy akong na-cover gahapon didto sa Hoops Dome sa ciudad sa Lapulapu. Liboan ka mga batan-on nga naggikan sa nagkadaiyang suok sa kapupud-an akong nasud-ong ug ang uban na-interview didto. Natandog ko sa pag-abot sa magtiayong Famador ug Devina Ybañez gikan sa Butuan City. Niapas sila sa ilang anak nga si Justin, 16 anyos, nga usa ka Youth delegate. Sa akong interview ilang gipadayag ang di matukib nga kalipay nga gibati nga nakasalmot ang ilang anak sa maong kalihukan. Usa diay sa ilang damgo nga mahimong usa ka pari si Justin pag-abot sa panahon. Si Theresa Pepino laing Youth delegate nga taga Quiot, Cebu City nipaambit sa iyang mga kasinatian. Matod niya daghan siya ug mapaambit nga pagtulun-an ngadto sa mga batan-on sa ilang parukya. Mao sab si Nina Almeda batan-on nga gikan sa Muntinlupa City. Nalipay siya nga nakaanhi sa Sugbo ug nakasalmot sa IEC Youth Day. Si Bishop Leopoldo Jaucian sa Archdiocese sa Abra nga maoy main celebrant sa closing mass nipadayag sa iyang dakong kalipay nga nahimong kabahin sa dakong kalihukan sa mga batan-on ning panahon sa IEC. Si Bishop Jaucian giabagan sa laing 12 ka obispo sa maong misa.