ANG pagkahimong santos.
Kini mao ang gitudlo ni Most Rev. Robert Barron, DD, ang auxiliary bishop sa Los Angeles, California sa Estados Unidos ngadto sa mga batan-on atol sa gipahigayon nga 51st International Eucharistic Congress Youth Day sa dakbayan sa Lapu-Lapu niadtong Huwebes.
Mokabat 3,604 ka mga lokal ug national nga pilgrims ang nitambong, aduna usab 700 ka international pilgrims ug kapin sa libo ka mga volunteer, base na usab sa datus sa organizers sa maong kalihokan.
Si Barron mao ang nihatag sa Catechesis sa mga batan-on mahitungod sa “The Strangest Way: Three Paths to Holiness.”
Una niini mao ang pagdawat sa matag usa nga iya sa Ginoo ang tagsa-tagsa ka kinabuhi.
Gihulagway pa niini nga ang kinabuhi dili usa ka wheel of fortune nga magtuyok, kinahanglan nga anaa ang matag tawo sa tunga ug dili magpadala sa pagtuyok niini.
Ikaduha mao ang pagdawat nga matag tawo makasasala ug ikatulo, nga ang usa ka santos makaamgo nga ang iyang kinabuhi dili para niya apan alang sa uban, “Every single person in this room has a mission.”
Human sa maong pakigpulog, usa ka workshop ang gipahigayon ug sa alas 3:00 sa hapon, usa ka Santos nga Misa mao ang gipahigayon diin gipangulohan ni Fr. Juris Calza, SDD.
Nitestimonya pa si Calza sa mga batan-on nga daghan na ang natubag nga mga pangutana sa pagtambong niya sa IEC.
Usa ka survey pa ang gibutyag niini sa iyang wali diin nihatag kini og tulo ka rason nganong gusto sa batan-on ang Eukaristiya.
Una niini ang pagkamahangupon sa komunidad, ang maayo nga homily ug ang maayo nga choir.
Apan duha ka punto ang gihatag niini sa mga nanambong sa maong misa, ang paghigugma sa selebrasyon sa misa ug unsaon paghangop pa ug paghigugma pa sa Eukaristiya.
Nihangyo usab kini sa mga kabatan-onan nga ingnon sila nga mga pari ug tudloan sila isip amahan sa simbahan kon unsaon nila pagtabang nga mahigugma ang matag batan-on sa Eukaristiya.
“Tell us how can we make an adjust that we help you (the youth) love the eucharist,” matod ni Calza.
Nitataw usab kini nga matag usa, nagkinahanglan og pagdasig ug himuon unta nga insperasyon ang pulong sa Ginoo.
“To love the Eucharist is to live the eucharist, Christ in Youth, Our Hope of Glory,” si Calza nagkanayon.
Human sa maong misa, usa ka pilgrim walk ang gipahigayon diin nituyok kini sa bag-o nga rota inubanan sa mga mananayaw nga susama og street dance sa Sinulog.
Nagkadaiyang mga batan-on ang niapil sa pilgrim sa nagkadaiyang simbahan ug Parish Youth Coordinating Council sa naglainlain nga simbahan sa tibuok nasod.
Sa datus usab sa Lapu-Lapu City Health pinaagi sa pangu niini nga si Dr. Rodulfo Berame, upat ka mga batan-on ang ilang natambalan, tulo niini ang gihilanat ug usa ang nagkalibanga.
Gikan ang duha niini sa Tacloban ug duha gikan sa Babag, Lapu-Lapu.
Usa usab ang gi-refer nila sa tambalan tungod kay nag-rashes kini sa sakit niini nga Chikungunya.
Sa alas 7:00 sa gabii, gisugdan ang Overnight Vigil ug Testimony diin gipangulohan kini ni Paul Ponce ug sa iyang pamilya.
Nahuman kini sa alas 4:00 sa kaadlawon karong adlawa dayon usa ka misa ang gipahigayon sa samang dapit.