USA ka adlaw sa dili pa matapos ang 51st International Eucharistic Congress nga gipahigayon dinhi sa Sugbo, unsa ang mamahimong bunga niini nga mahinumduman sa mga tawo?
Si Cebu Archbishop Jose Palma, presidente sa 51st IEC Cebu, nibutyag nga nagplano sila nga magpatukod og center alang sa mga kabos labi na sa mga libudsuroy nga kabataan.
Kini tawgon unya og Center for Periphery o sentro alang sa mga kabos.
“It is a project that should be a fruit of the IEC,” pamulong sa arsobispo atol sa ikaunom ug katapusang press conference sa 51st IEC sa Pavilion, Barangay Mabolo, siyudad sa Sugbo.
Wala na mohatag og dugang detalye ang arsobispo bahin niini apan matod niya mahimo kini nga kabahin sa memorial sa IEC aron mahinumduman sa katawhan nga dinhi sa Sugbo gipahigayon ang ika 51 nga IEC karong tuiga.
Si Palma niingon nga ang Eukaristiya – Garden of Thanksgiving mahimong handuman sa IEC nga namugna gumikan sa paningkamot sa committee on finance nga gipanguluhan ni Msgr. Roberto Alesna ug mga donor gikan sa pribadong sektor.
Ang arsobispo namahayag nga sila nagtuo nga ang IEC mahinungdanon ug gusto nila nga mahimong kabahin niini ang mga kabos hinungdan nga nag-umol sila sa committee on solidarity and communion nga maoy moatiman niini.
Ang maong committee ang Sugbo lang ang nag-umol niini tungod kay wa kini maapil sa ubang committees sa IEC nga gipahigayon sa ubang nasod.
Si Palma nagkanayon tubag usab ang sentro sa hangyo ni Ma. Georgia Cogtas, usa sa mga nihatag og testimonya sa ikaunom nga adlaw sa IEC sa Pavilion nga naghangyo sa mga parokya sa Sugbo nga gamiton ang ilang mga bakanteng lugar o luna isip pacilidad diin mahimo maligo, mokaon ug magtuon ang mga batang libudsuroy.
"Ang atong mga simbahan mao ang labing duol diin sila makakita sa Ginuo. Apan mao sab ni ang labing duol nga dapit diin ang atong kabataan makakita sa ilang mga damgo," matod ni ni Cogtas, kinsa usa ka kanhi batang libudsuroy.
Si Cogtas, usa ka eskolar sa Dilaab Foundation ug volunteer nga nagtabang sa pag-organize sa mga street children.
Matag Sabado, aduna sila’y kalihukan nga gitawag og Saturday Street Children Encounter diin mag-jogging, zumba ug magtudlo sila og insaktong paglimpyo sa lawas, catechesis ug tutorial sa mga bata ug usahay magdungan sila og panihapon.
Si Cogtas, 21, gradwado sa kursong psychology sa University of Cebu main campus, naghilak nga nipaambit sa iyang mapait nga kasinatian sa iyang pagkabata.
Nagpanuigon pa lang siya og 8-anyos dihang nakakat-on na siya manginabuhi pinaagi sa pagpangaykay og basura sa kadalanan, dump sites ug construction sites ug ang halin maoy ipalit og pagkaon alang nilang magsuon.
Siya ug ang iyang kaluha nga lalake ang kamanghuran sa pito ka magsuon. Batan-on pa lang sila dihang gibiyaan sila sa ilang amahan ug inahan.
Taliwa sa iyang mapait nga kasinatian nakakita siya og kahupay sa gibati gumikan sa pagtabang usab niya sa mga batang libudsuroy nga sama niya kaniadto.
Matod niya nga pinaagi sa kakabus, masinati ug mabati usab ang kahiusahan tali sa uban.
Si Padre Carmelo Diola, convenor sa Dilaab ug usa sa mga nagtabang ni Cogtas, nalipay sa gipahibawo ni Palma nga magtukod og sentro ang artsidyosesis alang sa mga kabos ug libudsuroy nga kabataan. Ang iyang grupo ang usa sa mga nagtabang sa mga bata nga kanhi nagsuroysuroy ug nag-standby lang sa kadalanan.
Si Cogtas nidugang nga sa kasamtangan adunay 23 ka mga grupo gikan sa simbahan, gobiyerno, civil society ug tunghaan ang nagtabang nila nga mapatungha ang kabataan nga ilang gitabangan.
Ang grupo ningtabang sa 54 ka mga bata. Suma pa niya 90 porsiyento niini nakabalik sa pag-eskwela ug duha niini kay ni-top sa ilang klase.
Si John Cardinal Onaiyekan, ang unang mamumulong sa ikaunom nga adlaw sa IEC subay sa tema “The Eucharist: Dialogue with the Poor and the Suffering,” niingon adunay nagkalainlaing klase sa kakabos sa kalibutan- ang material poverty, social poverty, spiritual poverty ug uban pa.
Apan alang niya ang material poverty ang angay hatagan og dinalian nga solusyon tungod kay kini ang usahay hinungdan sa kaalaot ug dili makiangayon nga panginabuhi.
“Poverty is not inevitable. Rather, it is due to human failures, like bad distribution of earth’s goods because of injustice and greed,” dugang sa Cardinal.
Siya nidugang gihatagan ang katawhan og resources ug responsibilidad niini ang pag-angay angay og bahin niini.