Saludo Kami: Matinabangon

SA KAPIGADO sa kadaghanan sa pagpangita og tubag sa pagpakabuhi sa ibabaw sa kalibutan, dunay pipila diay nga mas gihatagan pa og taas nga higayon ang mga butang nga gikaayo sa tanan.

Karong adlawa angay gyud nga saludohan kining atong bida diha sa iyang way-puas nga paghatag og kadasig sa kaugalingon diha sa pagtabang sa mga nanginahanglan.

Ang atong bida karong adlawa mao si Michael R. Manguhig, ang kasamtangan nga station manager sa 103.1 FM Radyo Pantukan.

Apan una siya naabot sa maong posisyon, miagi siya isip reporter ug writer sa EBC-dxED niadtong tuig 2000 hangtud 2003. Nahimong correspondent/cameraman sa Net 25 INC Channel sa tuig 2002 ug 2003.

Siya sab ang nahimong news writer/anchor sa dxRD sa tuig 2003 hangtud 2005. News director ug newscaster sab siya sa dxAM-Radyo Arangkada sa 2005-2010 hangtud nga siya na ang gibutang nga station manager karon sa 103.1 FM Radyo Pantukan.

Tukma sa iyang adlaw'ng natawhan karong umaabot nga Abril 29, 2015, ania ang iyang pinasahe nga istorya sa kinabuhi, nga hangtud karon pabiling mipuyo diha sa iyang mahigugmaon ug maluluy-ong kasingkasing.

++++

Oktubre 28, 2011, unang nadungog sa katawhang Pantokenyo ang akong tingog ug naila nga "Kuya Mike". Daghan ang nalipay, nalingaw ug naghinangop gumikan sa unang higayon nga nahitabo sa Pantukan nga dunay nagtingog sa kahanginan nga dangpanan nga makahupay sa kalaay sa kinabuhi.

Daghan ang mga panghitabo nga bunga sa pagpasagad sa kinaiyahan, sama sa mga mihapak nga bagyo sa dapit ug bisan didto sa Cagayan de Oro City.

Si Kuya Mike tua nga mitabang, dali nga nalukmay ang balatian hinungdan nga wa na ako naglangan sa pagpangayo og hinabang sa katawhang Pantokenyo, ug tuod man mibaha ang hinabang.

Human namugna ang "Operation Tabang" sa Radyo Pantukan dihang nahitabo ang Bagyong Sendong, sunod-sunod na usab ang pagdangop sa katawhang Pantokenyo nga dunay nagkalain-laing suliran sa kinabuhi sama sa dunay mga balatian, way panginabuhian ug bisan ang ginagmay'ng suliran giduol kang Kuya Mike.

Gikan sa pagsugod sa operation tabang hangtud ning kasamtangan di na maihap ang mga indibiduwal ug pamilya ang nahatagan og tabang sama sa medisina, bayrunon sa tambalanan, konsumo sa mga kabus ug daghan pang uban.

Alang kanako, normal sa sama nako nga anaa sa industriya sa broadcast nga dangpanan sa mga suliran sa katawhan apan di mawala ang pagbati sa mga tawo.

Isip usa ka responsableng magsisibya sa Lungsod sa Pantukan, mihatag ako sa paghulagway sa gipahigayong barikada sa mga raliyesta nga nagpatunga sa taytayan sa KingKing.

Nakakuha sa akong atensiyon ang usa ka pamilya nga sakay sa traysikol samtang nakaparada daplin sa kalsada kinsa natanggong usab sa lihok protesta niadtong mga taknaa.

Mikuha ako sa pakighinabi sa nagmaneho sa traysikol ug gipangutana labot sa gihimong lihok protesta, wala maglangan ang driver sa motorsiklo nga mipasibaw sa iyang kasuko sa mga raliyesta gumikan sa pagkatanggong sa ilang biyahe paingon sa Davao Regional Hospital sa dakbayan sa Tagum.

Nasayran ko na lamang nga eskedyul na diay sa iyang tulo ka tuig nga anak alang sa pagpahiling sa sakit nga cancer ug tungod niini nalukmay ang akong balatian hinungdan nga samtang nag-report ako.

Nakapasibaw na usab ako sa akong gibating kaluoy sa bata nga nangluspad gumikan sa tumang kainit luyo sa di maayong gibati sa lawas gumikan sa sakit nga cancer.

Tuod man wala mapakyas ang Radyo Pantukan sa paghangyo sa mga hintungdan ug gipalabay ang pasyente. Bisan pa man, malampuson ako sa akong tinguha nga makatabang sa duha ka pasyente luyo sa nagkainit nga isyu sa protesta ug kasuko sa mga raliyesta, niadtong mga orasa.

Bisan sa kainit sa adlaw, kakapoy sa trabaho ug peligrong sitwasiyon nga posibleng magbutang sa alanganin sa akong seguridad sanglit nag-inusara lamang ako nga nakig-atubang sa mga raliyesta, wala nako kini igsapayan, masalbar lamang ang duha ka mga kinabuhi sa 3-anyos nga bata ug hamtong nga babaye.

Sa kaulahian, mas misamot pa ang akong gibating kalipay ilawom sa akong kasingkasing sanglit di lamang diay ako ang mibati og kaluoy sa duha ka mga pasyente, kon di lakip usab ang mga tigpaminaw sa Radyo Pantukan nga nakadungog sa akong paghulagway sa sitwasiyon dihang giatiman ko ang duha ka mga pasyente.

Tungod niini, akong gibarugan sa akong kaugalingon nga akong ipadayon nga pamatud-an sa katawhan sa Pantukan nga ako ang magpabiling Kuya diha sa ilang mga kasingkasing.

Niining kasamtangan, di ko maihap ang mga tawo nga nagsalig kanato aron mahatagan og kasulbaran ang ilang mga nagkalain-laing suliran sa kinabuhi.

Sagad kanila natunulan sa hinabang nga medisina, napagawas sa ospital luyo sa dagkong bayrunon, napag-uli ang maayong pamuyo ug relasyon sa pamilya samtang tulo na usab ka pamilya ang natukuran og kaugalingon nga balay pinaagi sa atong kawsa ug programa.

Mapasalamaton ako sa KingKing Copper Gold Project nga akong nahimong partner sa 'Operation Tabang'.

+++

Ang kinasing-kasing nga pagtabang wa nagkinahanglan og balos, bugtong Diyos ang nasayud sa tanan aron mapadayon pa ang gitinguha alang sa tanang nanginahanglan.

Busa kanimo, Kuya Mike, saludo kami nimo!