DUMAGUETE CITY - Nakabsan sa kinabuhi ang tulo ka managsuon samtang nangalot kini og yuta aron manguhag bulawan.
Ang insidente nahitabo kini niadtong Sabado didto sa Sitio Bugtong Barangay, Tan-awan, dakbayan sa Kabankalan, Negros Occidental.
Ang managsuon giila nga sila si Danilo Nabas, 42, ug duha ka manghod nga sila si Rolando Nabas, 40, ug Reynante Nabas, 33, ug parehong mulupyo sa naasoy nga lugar.
Ang imbestigasyon sa kapulisan sa Kabankalan PNP pinangulohan sa ilang hepe nga si P/Supt. German Garbosa nagkanayon nga nagbangag og yuta ang tulo duol sa ilang pinuy-anan sa pamasin makakuhag bulawan.
Sumala pa nga ang tulo nagbangag kini sukad pa sa miaging tuig.
Dugang ni Garbosa nga sa wa pa nahitabo ang insidente si Rolando usa mga biktima nagdamgo kini nga dunay gilubong nga bulawan duol sa ilang panimalay hinungdan nga naenganyo sila sa pagkalot og yuta.
Samtang si Joseph Masola, igsuon sa asawa sa biktima, ang nadala usab sa tambalanan human nasimhot usab sa baho sa sulfur human misuway kini og susi sa nahimutangan sa mga biktima tungod kay wa na kini mitubag sa iyang mga tawag. Nakamaneho pa sa pagawas si Masola human nakasimhot sa baho sa kemikal ug namgayog tabang sa pagkuha sa tulo nga natanggong sa ilawom.
Sumala pa nga anaa sa 20 ka tiil ang gilawmun sa bangag ug naglisod sila sa pagkuha sa tulo nga wa nay panimuot.
Gisuwayan sila pagdala sa tambalanan apan gideklarar nga dead on arrival ang tulo. Dugang ni Garbosa nga mipahigayon silag post mortem examination aron sa pagtino kun wa bay foul play nga nahitabo sa insidente.