USA ka engineer ang napalgang wala nay kinabuhi mga alas 7:35 sa buntag niadtong Pebero 5 sa Purok 2, Barangay Bangcud, dakbayan sa Malaybalay, Bukidnon.
Ang biktima giilang si Dominador A. Manangan, 56, minyo, residente sa Purok 2, Barangay Nabag-o, dakbayan sa Valencia kinsa Second District Engineer II sa Department of Public Works and Highway (DPWH).
Sa inisyal nga imbestigasyon sa kapolisan uban sa Scene of Crimes Operatives (SOCO) sa Bukidnon Provincial Police Office, nasuta nga mga alas 7:30 sa buntag sa susamang adlaw ang biktima anaa sa sulod sa iyang sakyanan nga pick-up sa driver side nga bahin, wala nay kinabuhi ug nakaangkon og samad pinusilan sa ulo.
Giingong gipusil ang biktima sa suspetsado nga naila sa ngalan nga Julito Flores, hingkod ang edad, residente sa San Marcos, Barangay Santo Niño, susamang dakbayan.
Ang suspetsado giingong misibat sakay sa motorsiklo nga kolor pink nga dunay kombinasyon nga kolor puti ug paingon sa Barangay Aglayan susamang dakbayan.
Gilusad sa kapolisan ang hot pursuit operation apan wala nasikop ang suspetsado ug pabiling gawasnon hangtod ning panahona.
Nakuha gikan sa crime scene ang basyo sa bala sa kalibre 45 ug anaa ning panahona Bukidnon Crime Laboratory aron ipaubos sa ballistics examination.
Ang motibo sa pagpamusil patay ang padayon pang giimbestigahan sa kapolisan ning panahona. (SVB)