MGA kabataan sa Barangay Tibungco ning siyudad nga nag-edad og 6-16 anyos, nagsugod nagbansay sa duwang Futsal nga gipasiugdahan sa Maharlika Sports Development Institute Inc. uban ang Sun.Star Davao ug Sun.Star Superbalita didto sa Naval Camp Felix Apolinario sa Panacan.
Mokabat sa 70 ka mga kabataan, lakip na mga babaye ang nagsugod sa pagbansay sa isports.
Gibutyag ni Edgar Te, MSDII executive director, nga molungtad sa lima ka tuig ang ilang gigahin nga panahon alang sa pagbansay sa kabataan tungod apil ang pagmonitor kon milambo ba sila sa kinatibuk-an sanglit apil sa ilang training ang ilang mga batasan isip mga atleta.
"Usa ka hagit alang namo nga nagapasiugda niini nga training tungod dako mi og obligasyon samtang magtubo ang mga bata sa among mga kamot sulod sa lima ka tuig," matud ni Te.
"Salig mi nga makatampo sa among natun-an alang sa ilang pagdako kay kasaligan og maayo ang ilang mga trainor, mga coach ug mga may kasinatian sa dulang futsal," dugang pamahayag ni Te.
Sa unang mga adlaw, tudloan sila sa ball handling lakip na ang pagsuta unsa ang balaod sa duwa.
Suma pa nga dali lamang ang pagkat-on tungod hands-on ang pagtudlo kanila.
Si Coach Noel Presto nagsulti nga ang mga bata dunay kaugalingon nga talento nga motumaw ra panahon nga anaa na sila sa akto nga pagdula.
"Duna silay kaugalingon nga diskarte mao nga ang unang trabaho sa trainor o coach ang pagtuon unsaon nga magustohan sa mga bata ug iyang ma-enjoy ang training. Gikinahanglan pod namo nga inat-inaton ang among pailob kay kung di ka kapugong ug imong singkahan ang mga bata ugma wa nay mamalik," ni Presto.
Nagpasalamat sab sila nga gisuportahan sa pipila ka mga opisyal sa Barangay Tibungco ang kalihukan tungod ginahatud ug sundo ang mga bata padulong sa barangay sa Naval Field.
Gawas niini, nagpasalamat sab sila sa Sun.Star ug Sun.Star Superbalita sa suporta sa maong grassroot sports development program samtang ang Junior Chamber Inc. maoy nanganti sa training sa panginabuhian sa mga ginikanan.