USA lang siya sa daghang mga Pinoy nga boksidor nga mikuha og inspirasyon gikan sa kalampusan sa Pambansang Kamao sa Pilipinas nga si Manny Pacquiao. Sama sa iyang idolo, si Mark “Magnifico” Magsayo nagsugod sa boksing sa batang edad.
Si Magsayo natawo niadtong Hunyo 22, 1995 sa Tacloban City, Leyte apan sa Tagbilaran City, Bohol na nagdako. Ikatulo sa upat ka mga anak sa magtiayong sila si Joseph ug Shiela, si Magsayo nagtubo nga nagsunod sa mga away ni Pacquiao. Sama sa kadaghanan sa mga boksidor, gikan siya sa uyamot nga pamilya.
Miabli ang pultahan sa boksing alang kang Magsayo dihang namaligya siya og ice drop sa sangang buhatan sa bantugang ALA gym sa Tagbilaran City. Mismong ang tag-iya sa ALA gym nga si Cebu boxing patron Antonio L. Aldeguer ang nakadiskubre kang Magsayo.
Niadtong higayuna, nag-edad pa si Magasayo og otso anyos.
“Kahinumdom ko nga gipakyaw og palit ni Sir Ala ang akong ice drop. Mibalik ko sa gym ug nananghid ko ni Sir Ala nga gusto kong mag-training sa iyang gym,” matod pa ni Magsayo.
“Gusto gyud kong mag-boksidor kay na-inspire ko ni Manny Pacquiao. Gusto kong makasunod sa iyang kaagi.”
Tuod man, nag-training na’g sugod si Magsayo apan sa nag-una niyang upat ka mga away sa amateur rank, kapildihan ang iyang natagamtaman. Niadtong mga gutloa, matod ni Magsayo nga gipaundang na siya sa iyang amahan sa pag-away.
“Ingon lagi akong papa nga dili na lang ko mag-boxer kay wala ko’y paglaom ani nga duwa,” batbat sa 20 anyos nga boksidor.
Usa sa mga igsuon ni Magsayo maoy unang nagboksidor apan wala kini magdugay.
Tungod sa iyang determinasyon nga maabot ang iyang pangandoy, mas naningkamot si Magsayo sa training hangtod nga natilawan niya ang labing una niyang daog sa ikalimang pagsuway.
Nagkakuyaw ang abilidad ni Magsayo ug padayon siyang nanghakot og kadaugan. Kapin sa 200 ka mga away ang iyang nasagubang sa amateur rank diin midaog siya sa kadaghanan niini.
Nakalangkat og upat ka gold medals si Magsayo sa national competitions ug kaduha napasidunggan isip Best Boxer awardee.
Ang Amateur Boxing Association of the Philippines (ABAP) gusto untang kuhaon si Magsayo aron mahilakip sa national pool apan mas gipili niini nga mosaka sa professional rank.
Niadtong Hulyo, 2013, si Magsayo pormal nga mipirma og kontrata ubos sa ALA Promotions nga nagbasi sa siyudad sa Sugbo. Nahilakip na siya sa listahan sa world-class nga ALA fighters.
Sa premiro niyang away isip professional boxer, nabunyagan si Magsayo og 1st round knockout nga kadaugan batok kang Melton Sandal niadtong Mayo 25, 2013 sa Waterfront Hotel sa Lahug, Cebu City.
Nasundan kini ni Magsayo og laing 1st round TKO nga kadaugan batok kang Jamjam Ungon niadtong Hulyo 13, 2013 sa Solaire Resort Hotel and Casino sa Pasay City.
Human sa 10 ka mga away, ang ALA Promotions nakahukom nga hatagan na og title fight si Magsayo aron masukod ang kapabilidad niini.
Giparang sa ALA Promotions si Magsayo batok kang Mexican Rafael Reyes alang sa inilugay sa bakanteng International Boxing Federation (IBF) Youth featherweight title niadtong Hulyo 11 sa miaging tuig sa Waterfront Hotel sa Lahug.
Gipakita ni Magsayo nga andam na siya sa mas dagkong mga away pinaagi sa pagposte og 5th round TKO nga kadaugan batok kang Reyes.
Sa labing una niyang pag-away sa Amerika, niposte og impresibong 1st round knockout nga kadaugan si Magsayo batok kang Mexican Yardley Suarez niadtong Oktubre 17, 2015 sa Starhub Center sa Carson, California.
Karong Pebrero 27 sa Waterfront Hotel Cebu, laing malisod nga pagsuway ang sagubangon ni Magsayo.
Iyang ikasangka si Mexican Eduardo Montoya sa co-main event sa Pinoy Pride 35 Stars of the Future boxing promotion.
Wala pa man tuo’y klaro kon kanus-a siya makaaway alang sa lehitimong world title apan ang labing seguro, nagkaduol na siya sa iyang pangandoy.