GILIHOK na karon sa militar ang pag-activate sa mga reservist sa army, navy ug air-force suma sa akong nadungog sa interbiyo sa usa ka military official sa radyo sa miaging adlaw.
Wa iklaro pagsulti ang tuyo, apan masabot nga kini usa ka pangandam. Dalaygon kini nga lihok sa militar labi na ning nagkainit nga pangangkon sa China sa atong mga isla sa West Philippines Sea.
Di kasaligan ang atong gisang-at nga reklamo sa International Tribunal sa paghusay ning maong kasungian kay di`motahod ang China sa huridiksiyon sa gihisgutang hukmanan.
Nagpasabot sa kagahi sa ilang liog. Sa nag-awas-awas nilang kadawo. Sa pamintaha ning pag-angkon nila sa mga isla nga di ilaha nga ilang gitukoran karog mga run-way ug mga military facilities.
Gani, gidudahan nga nagbutang na silag missiles system sa usa sa mga isla. Kon tinuod ni kakuyaw! Usa lang ka pindot mapulbos dayon ang usa ka siyudad sa Pilipinas.
Ang nakakunsuylo kay anaa ang Estados Unidos sa America nga misaad sa paglaban sa Pilipinas kon kini sulngon ubos sa EDCA (Enhanced Defense Cooperation Agreement).
Ang kasuko ni Senador Miriam Santiago sa EDCA gisawo lang sa hangin. Ang Korte Suprema niisa sa EDCA nga gikinahanglan sa atong seguridad. Husto si Miriam, kitay molaban tuod pagpatunhay sa atong soberanya.
Apan unsaon man nato paglaban kon kuwang tag modernong kahimanan labi na sa pagpakigbatok sa usa ka superpower nga mao ang China. Ang mga hinagiban nato sa gubat igo lang mogitik sa mga Insek sa pagkagiki sa atong kahuyang.
Karon lang ta nga misugod pagpamalit og mga modernong jet planes kay gikuyawan ta ning maong kasungian. Manguros lang ta kon naa na ang kilat. Gipangurakot man gud sa mga heneral ang pundong binilyon alang unta sa Armed Forces Modernization program.
Mga dekada na kining maong programa sa Armadong Kusog, apan nag-aginod ang pagpatuman niini tungod sa pangurakot diha sa kadagkuan sa military hinungdan nga natawo ang RAM (Reform the Armed Forces Movement) ni Honasan nga wa say nahimo.
Gikinahanglan tuod karon ang mga reservists aron ipuno sa atong kasundalohan. Linibo sad ning atong reservists sa ranggong colonel, major, kapitan, teniyente, sarhento ug kabo. Gikinahanglan ang able-bodied reservists. Ako reservist nga sarhento, apan di na makakatkat og bungtod tungod sa kahuyang sa tuhod, apan kon ang gubat naa sa patag makaapil pa ko sa pagpanalipod sa atong yutang natawhan.