Garcia: Ing mabungang impugn (A tree so-full of fruits)

“AMBISNA sanu, gawan yang mayap ing impun o ing bunga na,
o gawan yang marok ing impun at ing bunga na; uling makikilala ya ing impun
kapamilatan ning bunga na. Ikayung anak ning kamamalu, anting marok,
makananu kayung magsalita dikil karing mangayap a bage?
Pauli ning king kasaplalan ning pusu karin manibatan ing panyabyan yu.
Ing mayap a tau pauli ning mayap nang pibandyan magdala yang mangayap a bage;
at ing marok a tau pauli ning marok nang pibandyan magdala yang mangarok a bage.
At sasabyan ku keka, a balang alang-ulagang bage a sasabyan ding tau,
mamye lang kabilangan kareti king adlo ning pamanukum.
Pauli ning kapamilatan ding amanu mu mirinan kang katalarwan,
at karing amanu mu miyatulan ka.”

~ Mateu, Dangka 12Sunis 33-37
(Matt 12:33-37).


***

Parati’t maralas da lang pamaronggan deng mabungang impun, detang mamutiktik at sapa-sapunggul a bunga. Deti ring maralas mapapansing at pauli na nita dakal lang magnasa karing bunga na. Buri da mika-antita la naman karakal a bunga.

Dakal lang marirya inya sa’t dakal lang mamarongga. Pumukul. Mamuga. Mamasibas. Karakal a amanu king Kapampangan a mangabaldugan metung mo, ne abe? Antita ya naman uri nung impun ya ing Indung Siswan. Atin naman kayang mamarongga, pumukul, mamuga o mamasibas? Balamu ata ala man. Kasi dakal kareng kabalen, lakwas na kareng kayanakan a pikarine de ing sarili dang amanu.

Melili ing pisasabyan pala. Isubli ta ya.

Neng mamayutputan ya bunga ing impung-tanaman, balang manakit bisang magtal kareng bunga na. Dapot neng matas ya iti at e do ayabut, kukwa na la mung batu bang pamaronggan la ring bunga na bang manganabu la at king dapat ayta deng bunga mangabugbug la inya sa’t ditak na la mung apapakinabangnan.
Oneng deng makasariling tau lakwas da pang pilinan ing mangabugbug la reng bunga kesa keng aliwa la reng makinabang. Mangibabo ing pangamakasarili da. Manaig ing kasakiman at masasaul ing katalarwan.

King tutung bye, mengari king mabungang impun, deng taung dakal agagawa o apapalto kayapan king dakal a bage dakal lang marirya, inya sa’t dakal lang mamarongga karela. Asasaksyan tamu yan kareng mangapalyari king adlo’ldo.

Alimbawa namu ing Punbangsa o President PNoy (Pres. Benigno “Noynoy” C. Aquino III) at ing keyang Dalang Matulid. Akakit da reng aliwang bangsa ing agagawa nang maragul a kayapan?para king kabyayan, kapayapan at king dakal a dane ning kasuywan king bangsa?dapot dakal karing kabalen tamu ing pipilinan da pang lawen ing para karela kakulangan o agya mang kalabisan para karela.

Dakal a mamansag kayang “abnuy” o nanu pang aliwang bage e manayun pakirandaman. Sisti keta, sisti keni kareng kabalen a mapangarirya. Magbulagbulagan la’t magmaklak-maklakan king nanu mang kayapang darala na ning mayap a kasuywan ning Punbangsang PNoy. Ing akakit da mu ya pin ing kamalyan na a magmula king karelang mapangariryang pilubluban.

Tutu, e ya pantas at ating malyaring ipintas pa kaya, dapot ninu mo ta ing alang kapintasang tau? Dapot nung kutnan mu la nung nanung ay-munikala da bang magbayu ya’t misaplala ing bangsa, dakal karela ing satsat mu at ala lang balung imunikala.

Ing balu da mu reng mapangarirya ya pin ing mamarongga karing balu da namang mamayutputang bunga ning Dalang Matulid. Inya sa’t deng sablang kasaup o galame nang PNoy, lakwas na ing tatagal punbangsang i Mar Roxas, miyayabuban king karelang barongga.

Kareng buri dang iyalili kang PNoy subali kang Mar Roxas, lakwas la pa dakal a rusing at pintas king pangatau da ing akakit karela. Nyayta, e uling mamayutputan lang kayapan nung e manyampilak lang kapintasan.

Malino ita, abe.

***

Dake Talabaldugan:
1. batilaw, bantilo – (panguri) – e melutung masalese. English – interrupted cooking, almost but not yet fully-cooked. Alimbawa king pamangamit: “E dapat tataginan ing diderang mung balasenas uling pota ma-bantilo ya.”
2. batíng – (palagyu) – patibung a lubid o dala. English – net-trap, leg-trap for animals. Alimbawa king pamangamit: “Merakap ya mu rin ketang selabat ming bating keng lungga na ing dagis a gayndu .”
3. batingo – (palagyu) – kumpana. English large bell, usually used in churches. Alimbawa king pamangamit: “Ginawa lang batingo para king pisamban king kabalenan karing pira-pirasung tansung inambag da reng memalen.”
4. batingting – (palagyu) – malating batingo o atlungsuluk a titigtigang bakal. English – small bell or musical triangular instrument. Alimbawa king pamangamit: “Katigtig ning batingting kanita la memanyiklod karing intud da reng sablang sisimba .”
5. batis – (panguri) – bukal, sibul, ulu. English – water spring. Alimbawa king pamangamit: “Manyaman mandilu king batis king bitisan ning Bunduk Alaya.”

***

KASEBYANG KAPAMPANGAN: “Ing impun a dakal a bunga – ya ing parating mababarongga”. Rirya. Panugaling e manayun. E makatula. Deng taung pamangarirya dakal la dapat a pikakasaman. E da buring manakit mimigit karela At uling ala lang mayumung bunga, gawi dang mamarongga?karing karelang pangariryan?.deng taung dakal a masanting a daraptang mayap. Inya nun gating mamarongga karing “mabungang impun” o mayap a tau, alang aliwang sangkan nung e kariryan da la mu pauli ring bunga na. Alimbawa: “Dakal lang marirya kang Abling king keyang dakal a kegiwan, inya anting impun a dakal a bunga parati yang mababarongga.”

***

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Pakiparala king email address, garciakragi@yahoo.com o iyaus o i-text king +639196940224 o +639423924399. Nung karapatdapat ya’t makayagpang king dalerayang tuntunang Kapisik, masa kang milimbag ya sanu man kareng tutuking dangka ning Kapisik. Ipisik me, abe!

style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph