Tests nagpakita nga Lapu beach limpyo

GIHIKYAD ni Lapu-Lapu City Health Officer Dr. Rodolfo Berame ang resulta sa water analysis sa kadagatan sa Mactan niadtong Septiyembre ug Marso sa miaging tuig.

Ang labing uwahing water samples nga gikuha niadto lang Lunes alang sa laboratory ana­lysis wa pay resulta.

Ang duha ka mga lab test nga gihikyad ni Berame nagpakita nga pasado sa gihimong bacteriological test, sukwahi sa taho nga giluwatan sa Environmental Management Bureau (EMB).

Matod ni Berame nga ang report sa EMB makadaot sa tourism industry sa Lapu-Lapu nga nagsilbing backbone sa ekonomiya sa dakbayan, ilabi na ang mga baybayon ug kadaga­tan sa Mactan maoy nagsilbing tourist destination.

Gisalikway ni Berame ang report sa EMB nga mo­abot ngadto sa 13,000 Most Probable Number (MPN) nga gidaghanon sa fecal coliform kon hugaw sa tawo.

Miapod-apod si Berame sa kopya sa ‘Bacteriological Test Result for Recreational Water’ nga gikan sa Talisay Water Laboratory, usa sa mga Department of Health (DOH) accredited water testing laboratory nga gihimo niadtong Marso ug Septiyembre sa miaging tuig.

Ang Pacific Cebu Resort, Be Mactan Resort, Maribago Bluewater Beach Resort, Blue Reef Beach Resort, Vaño Beach Resort, Crimsons Resort and Spa pulos pasado sa maong test.

“I was wondering why nga moingon ang EMB nga contaminated (kadagatan),” tipik sa pamahayag ni Berame ngadto sa mga tigbalita.

Nisugyot ang opis­yal ngadto sa EMB nga makig-alayon sa ilang buhatan ingon man mopahigayon og joint sampling sa kadagatan sa Mactan uban sa representante sa city health office aron matino ang taho.

Dugang pa niya nga way nadangat nga reklamo sa ilang buhatan nga gikan sa mga resort owners o management ingon man niadtong mga nangaligo nga apektado sa kontaminado nga dagat.

Ang EMB nipahibawo sa miaging adlaw nga taas ang level sa coliform sa kadagatan sa Mactan, labina sa pampublikong mga beach.

Samtang nasagmuyo ang corporate marketing and communications manager sa Maribago Bluewater Resort, Enrico Monsanto sa maong kalambuan sa dihang niadto lang miaging buwan gi-accredit ang ilang establisemento sa ASEAN Green Hotel Standards 2016-2018.

Ang maong accreditation nagpasabot nga ang Maribago Bluewater pasado sa environmental standard gumikan sa paningkamot nga kapanalipdan ang kadagatan ilabi na ang ilang waste water management nga kabahin na sa ilang na­andang operasyon.

“We will not do anything nga makadaot sa atong dagat, puhonan baya namo ang dagat,” dason ni Monsanto sa dihang nahinabi sa Sun.Star Superbalita.

Masaligon ang opisyal nga di gikan sa ilang resort ang tinubdan sa gikatahong taas nga coliform level ug daghan posible nga hinugndan nga nitumaw ang kontaminado nga tubig sa Mactan base sa taho sa EMB.