PNoy mibisita sa Bohol kuyog ang LP

TAGBILARAN CITY, Bohol - Daw sama sa gipinturahan og ko­lor yellow ang probinsiya sa Bohol niadtong miaging Miyerkules nu­not sa pagbisita ni Pres. Benigno Aquino III uban ang mga kandidato ubos sa Liberal Party (LP).

Gitambungan ni Aquino ang Cap­sule-laying ceremony sa New Bohol Airport ug ang Switch-on ce­remony for the Electrification alang sa 2,651 ka mga sitio sa Central Visayas ubos sa Sitio Electrification Program (SEP) didto sa Barangay Lourdes, Panglao, Bohol isla sa Panglao inubanan nila ni Gob. Edgar Chatto ug Kong. Rene Relampagos samtang ang iyang mga kaubanan nag-iyahay og pa­ngulitawo ngadto sa laing–laing mga kalungsoran sa probinsiya.

Adunay mibisita ngadto sa lungsod sa Cortes, Tubigon ug Tubigon.

Human sa pagsuroy ngadto sa mga kalungsuran, katapusang biyahe sa LP mao ang dakbayan sa Tagbilaran, diin didto nagtapok uban sa mga lokal nga kandidato ubos sa partido gikan sa lainlaing kalungsuran lakip ang mga suporters sul-ot ang kolor yellow isip pagsuporta sa “Daang Matuwid” nga pundok didto sa Bohol Cultural Center.

Giunahan ni Sen. Ralph Recto ang pagpangampanya ngadto sa mga Bol-anon, sunod si “Mr. Energy” Jericho Petilla, “Big man sa Senado” Franklin Drilon, “Tesdaman” Joel Villanueva, Ina Ambolodto nga representante sa Muslim Community, “Mr. Coop” Cresente Paez nga usa usab ka Bol-anon, Risa Hontiveros nga gipasidak-an ang ka­babayen-an, Mark Lapid nga nag­sentro sa Turismo inubanan sa iyang amahan nga si Lito Lapid.

Wa maka-uban sa Bohol ang uban nga mga kandidato sa pagka-senador nga sila si Justice Secretary Laila Delima, Sen. TG Guingona, Francis Pangilinan ug Ping Lacson.

Human sa pagsulti sa tanang senatorial candidate, misunod ang vice presidentiable nga si Leni Robredo diin mihisgot sa pagkamatay sa iyang kapikas nga si kanhi DILG Secretary Jessie Robredo.

Mihatag usab ang abogado og “words of encouragement” sa tanan nga nakasinati og mga pagsulay, ilabina kadtong nawad-an og kapikas sa kinabuhi.

Samtang si presidential candidate Mar Roxas nihangyo og “dagdag pa more” nga suporta ngadto kaniya ug sa mga kaubanan niini.

Gisundan usab kini sa mensahe ni Aquino diin nanghinaot ang presidente nga mamahimong “international airport” sa umaabot nga panahon ang gitukod karon nga Bohol New Airport sa Panglao.