LAAK, Compostela Valley -- Usa ka gituhoang miyembro sa New People's Army (NPA) ang namatay samtang usa ka miyembro sa Civilian Armed Forces Geographical Unit ang samdan sa pinusilay didto sa Sitio Agsam, Barangay Datu Ampunan, alas 7:00 sa buntag, Sabado.
Ang samaron giila nga mao si CAA Rana Casigtuan, hamtong ang edad, sakop sa Cafgu ilawom sa 72nd Infantry (Gabay) Battalion, Philippine Army.
Segun sa taho sa kasundalohan, naglusad og combat operation ang mga sakop sa 72nd Infantry Battalion ug 60th Infantry Battalion, ilawom sa pagpanguna ni 2nd Lieutenant Sandy Atienza, dihang gikahibalag ang dul-an sa 30 ka NPA.
Milanat sa tunga sa oras ang pinusilay diin nasamdan si Casigtuan.
Sa gilusad nga clearing operation, usa ka patay'ng lawas sa wala pa mailhing lalaki ang napalgan sa encounter site.
Narekober sab ang usa ka M14 rifle, dunay serial number SN 153282, lima ka back pack ug usa ka Improvised Explosive Device.
Ang samaron nga Cafgu gidala sa Camp Panacan Station Hospital sakay sa helicopter.
Patay'ng lawas sa NPA gihaya sa usa ka punerarya sa Poblacion, Laak. (RSC)