GIPILDE sa Kagayanong si Maico Fernandez ang iyang Cebuanong kaatbang sa semifinals aron moabante sa finals sa 51 kilograms men’s Muay Thai atol sa 2015-16 Philippine National Games (PNG) National Championships niadtong Miyerkules sa Lingayen, Pangasinan.
Nidaog si Fernandez agi sa unaninomous decision batok kang Arjun Pepito sa Cebu City sulod sa tulo ka rounds.
Maatbang ni Fernandez, garbo sa Mindanao Ultimate Mixed Martial Arts (MUMMA) ang Ilonggong si Peter Solido sa finals, sa ning pagsulat Biyernes.
“Naa siya sa maayong lawas ug kondisyon ug hinaot magmalampuson siya,” ingon ni Beh Barothy Hung, ang manager ni Fernandez ug tigdumala sa MUMMA.
Mahinumduman nga ni-qualify si Fernandez sa National Championships human gidominar niya ang PNG Visayas leg niadtong Nobyembre sa niaging tuig didto sa San Jose, Antique.
Sa pikas bahin, gitaho sab nga pito sa walo ka entrante sa Cagayan de Oro boxing team ang niabante sa finals.
“Kulbahinam nga mga daog ug daghan sila nakasulod sa finals,” ingon ni Barothy, kinsa sab nag-officiate sa Muay Thai.