SECTIONS
philippines
Thursday, August 05, 2021

Serna: Mayo, bulan sa pista ug mga bulak

MAYO na! Bulan sa pista ug mga bulak. Malipayong pista sa mga parokyano sa St. Joseph The Worker Parish sa Nueva Caceres, Oslob ug mga silingang barangay.

Malipayong pista usab sa Tagbilaran, Bohol ug sa uban pang mga dapit sa nasud nga magpista karong adlawa ug sa ubang adlaw sa Mayo.

Sanglit bulan sa mga bulak, ayaw mog kalimot pag-apil sa panon sa mga malipayong mohalad og bulak ngadto kang Mama Maria sa tibuok bulan.

‘Mangadto kitang tanan… Sa mga bulak magdala… Ihalad ta kang Maria kay siya atong Inahan.’ Nakahinumdom pa gyud ko sa kanta. Anà.

***

Huh! Apil mo sa morag gikutasan pagpaabot, pag-ampo, pagpanghinaut nga di madayon ang pagtsugi ni Mary Jane Veloso? Kutas no?

Pero magpasalamat ta nga gilugwayan pa intawn ang sa iyang kinabuhi. Bisan nagpadayon pa siya pagpuyo sulod sa prisohan sa Indonesia, maayo na lang nga gihatagan pa siyag higayon nga mapadayon ang husay.

Maayo gyud ang Ginoo…sa tanang higayon!

***

Uy! Unya nakapili na mo asa motan-aw sa away ni Manny Pacquiao ug Floyd Mayweather karong Dominggo? Kinahanglan nga maayo gyud ang pagkapwesto nato aron makabwelo tag singgit.

Pagbantay lang nga di ka maigo sa kumo sa imong tupad ug naa sa luyo. Naa bayay uban nga dali kaayong madala sa ilang gibati.

Sa mga nidapig sa ‘pambansang kamao,’ atong apilan og pag-ampo ang atong pagsuporta. Anà!

***

Nawindang silang Vice Ganda, Jhong Hilario, Vhong Navarro ug uban pang taga It’s Showtime pagkahibalo nilang maayong mosultig Cebuano ang lima ka Amerikanong sakop sa Hey Joe Show apan di kamao mo-Tagalog.

O-ha! Makalingaw man sab gyud tinuod tan-awon ug paminawon ang mga kyampaw. Tiaw mo bang pagkaparendyer og barug unya lareno diayng mosultig Cebuano.

Naay uban diha nga pwerteng ka pyanga unya morag kinsang magsigeg Inengles bisan sakay sa dyip unya bisag nagtupad, morag taglima ka dupa ang gilay-on kon mag-istoryahanay.

Nakapahiyom lang kong naminaw ug sa hilom nakaingon: ‘Ayaw kog hagita!’ Weeey!

Naa diay sa Ayala Center Cebu Terraces ang Hey Joe Show karong alas 4 s.h.

***

Nakalitan ko sa pagkatangtang sa trabaho sa atong mga higala ug kauban sa buhat sa GMA 7 Cebu (lakip na sa ubang lugar sa nasud). Pero matud pa sa GMA 7 corporate communication group pinaagi ni Jojo Aquio ug Iris Joy Abarquez, kabahin kini sa gitawag og ‘strategic streamlining’ ug nga way labot niini ang pagsulod sa network sa bosing sa San Miguel Corp. nga si Ramon Ang.

Atong hulaton ang mga kalambuan lakip na ang mga lakang sa atong mga higala.

***

Naa na sab diay laing proyekto ang malampusong tandem ni direk Brilliante Mendoza ug superstar Nora Aunor nga nakasulod gyud sa usa ka kategoriya sa Cannes Film Festival sa France.

Kini mao ang Taklub nga nag-asoy sa kasinatian sa usa ka inahan atol sa pagkusokuso ni supertyphoon Yolanda sa Tacloban. Gipaabot nga dugang dungog ang dad-on niini sa nasud.

Hinaut nga may mapugnit usab kini nga mga pasidungog.

***

Mora gyud og akoy gipaabot niadtong Martes sa gabii didto sa Sto. Niño pilgrim center sa pagtak-op sa ika-450 nga anibersaryo sa Kaplag. Una nakong nakita ang choreographer nga si Dax Barlaan kinsa niagni nako nga magdali kay hapit na magsugod ang finale.

Akong nasugat sila si Victor Cuenco, Marti Ybañez ug uban pang sakop sa grupo ni direk Junjet Primor nga nagdumala sa pasundayag. Si direk Junjet mismo ang nipahimutang nako sa usa sa mga lingkoranan kay magsugod na.

Tuod man, nindot ang pasundayag. Mora kog nagtan-awg Sinulog grand parade sa bulan sa Enero kinsa magdungan pagsinggit og Pit Senyor ang mga mananayaw ug ang tumatan-aw.

Pero duna gyuy uban nga ang singgit “Pet Senyor” inay “Pit Senyor.” Paet ba! Pag-sure mo uy!

style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph