20 ka babayeng tinun-an 'nasudlan' og espiritu

DI mominos 20 ka mga tinun-an ang giingong nasudlan og dautang espiritu sulod sa ilang tunghaan sa dakbayan sa Mandaue nga niresulta sa pagkasuspenso sa ilang klase kagahapon sa buntag.

Nagtuo ang mga tinun-an sa Jagobiao National High School nga ang wa pagpananghid sa giingong nagpuyo sa kahoy sa tunghaan nga giputol ang rason.

Pinaagi sa nakuhang video sa usa ka Rhene Magusara, nagpuyo sa dapit ug usa sa mga ningtabang, makita nga ang mga tinun-an gitabangan sa ilang mga classmate og kupot tungod kay kusgan kaayo ug nanglugnot.

Makita usab sa laing video ang usa ka babayeng tinun-an nga giingong nasudlan og dautang espiritu nga gipangutana pa kini sa usa sa mga nagtabang kanila kon unsay gusto niini ug nganong nisulod matod pa sa lawas sa bata.

Si Anna (di tinuod nga ngalan), tinun-an sa grade 10 sa maong tunghaan, niingon nga sa wa pa ang hitabo, sila tanang mga tinun-an nag flag raising cere­mony ug pagkahuman nag-anunsiyo sa ilang cheer dance competition.

Human nila naandam ang tanang mga kinahanglanon, ningsaka sila sa stage, apan mao nalang ang ilang nadungog nga dunay babayeng tinun-an nga nisiyagit ug niingon nga duna silay kuhaon nga usa ka estudyante nga gwapang babaye.

Nihulagway pa si Anna nga human makasulti niadto ang tinun-an, nikatag kini sa ubang mga tinun-an diin iyang gihulagway nga lain paminawon ang tingog sa mga nasudlan ug dunay uban nga nangausab ang dagway.

Ang gituohan nila nga rason mao ang kahoy nga gipamutol nga wa mananghid ang nagpaputol.

Apan gipasabot sa principal sa tunghaan nga si Rufino Tudlasan Jr., nga namutol sila og kahoy tungod kay gigamit nila ang dapit aron tukuran og 3-storey building nga dunay unom ka classrooms alang sa senior high school.

Dugang ni Tudlasan nga dihang nahitabo kini kagahapon, duna siya’y gitambungan nga meeting apan dali siya nga nibalik sa tunghaan human masayod sa panghitabo.

Nimando dayon siya sa advisers nga papaulion ang mga tinun-an ug isuspenso ang klase aron maatiman ang sitwasyon nga nitumaw sa tunghaan ug di na makaapekto sa ubang mga tinun-an.

Samtang si Rev. Fr. Reynaldo Cui sa simbahan sa San Pedro Calungsod sa Mohon, Sogod, nipasabot nga posibleng di possession ang nahitabo sa mga tinun-an.

Kini tungod kay aduna’y basehan ang gitawag sa simbahan nga certified case sa demonic possession.

Matod ni Cui nga duha ang ilang tan-awon niini nga rason.

Usa niini mao ang demonopathic hysterical madness (DHM) kun nagtuo ang tawo nga nakakita sa maong panghitabo nga nasudlan siya sa dautang espiritu apan di kini kompirmado nga possession ug usa lang ka psychological condition.

Ikaduha mao ang emotion contagion diin magtakudtakod ang kahimtang sa usa ka tawo nga mag-hysteria usab ang nakakita niini.

Mao kini ang natural o sagad sa mahitabo sa ma­kakita sa panghitabo.

Dugang ni Cui nga nagkinahanglan og usa ka awtorisado nga tawo o pari aron mosuta kon possession ba ang nahitabo sa mga tinun-an.

Lakip sa mga sintomas sa possession mao ang paglitok niini og lain nga pinulongan ug ang abilidad niini nga telekinetic effect diin makapalihok siya og butang bisan wa niini hikapa o kaha makapawong sa suga.

Tambag niya sa mga magtutudlo nga makasinati og ingon niini nga i-isolate ang mga bata sa kadaghanan ug ang mga lalake maoy mobantay niini.

Nipasabot kini nga mas duol sa pagkatakod sa hysteria ang babaye itandi sa lalake.

Gikinahanglan usab nga ipaubos sa psychological ug psychiatric intervention ang bata nga nag-hysteria.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph