KIDAPAWAN CITY - Gitakda nga ipatawag sa Kagamhanang Probinsiyal sa North Cotabato ang mga taas nga opisyal sa National Grid Corporation of the Philippines (NGCP) gumikan sa sunod-sunod nga pagpamomba sa ilang transmission tower.
Matud ni Governor Emmylou Mendoza gustong mahibaluan sa kagamhanan ang gihimong lakang sa NGCP aron ma-protektahan ang ilang mga electrical lines batok sa mga dautang grupo.
Susihon sab ang posibleng pangilkil ang motibo o kaha problema sa yuta nga gitarukan sa mga tore sa NGCP ang hinungdan.
Ang pagpatawag sa mga opisyal sa NGCP natumong sa himuong Provincial Peace and Order Council Meeting uban ang mga opisyal sa kapulisan, militar ug mga lokal nga ehekutibo ug mga stakeholders.
Gikanayon ni Mendoza kinahanglan nga dunay inisyatibo ang NGCP aron resulbahon ang sunod-sunod nga pagpamomba sa ilang mga tower.
Gibarugan ni Mendoza nga dili puwede nga ikaltas sa mga konsumidores pinaagi sa universal charges ang danyos sa ilang mga tore.
Kini gumikan kay usa ka private commercial company ang NGCP nga mikita og minilyon ka pesos gikan sa katawhan.
Nahibaluan nga nakaabot na Sanguniang Panlalawigan (SP) sa probinsiya ang resolusyon gikan sa Misamis SP nga nag-aghat sa mga opisyal sa Mindanao nga mohimo og lakang ang NGCP sa mga tore niini nga gibombahan sa North Cotabato, Lanao del Sur, Maguindanao ug Sultan Kudarat.