KUNG gusto ka og tinoud nga sakripisyo, pamalandong, matilawan pa ug madayeg ang kanindot sa overlooking nga palibot, gawas sa tanan masaksihan ang pagsiga ug pagsawop sa adlaw samtang gibalik lantaw ang pagsakripisyo sa Ginoo aron kita maluwas.
Adunay lugar nga perpekto alang kanimo ning pagbalaan sa Semana Santa ug kini mao ang Sipaka Island nga makita sa lungsod sa Talisayan Misamis Oriental.
Kung gikan denhi sa siyudad sa Cagayan de Oro, maabot lamang kini ngadto sa duha ka oras og tunga pinaagi sa pagsakay og bus diha sa Agora Terminal. Dili problema ang pamasahe tungod kay sa kantidad nga P85 maabot na nimo imong destinasyon.
Pahimangno lamang ni Boyet Cayetuna, ang Municipal Tourism Officer sa lungsod sa Talisayan, Misamis Oriental nga obserbahon ang mga ginadili sa pagsaka sa maong isla. Lakip sa gidili mao ang pagdala og mga ilimnong makahubog, sigarilyo, ug mga hait nga hinagiban tungod kay sa entrada pa lamang nga bahin kini pagakumpiskahon ug kinahanglan usab nga magparehistro sa imong pangalan alang sa imong seguridad.
Niaging tuig mitala ang lokal nga kagamhanan sa lungsod sa Talisayan og 20,800 kapin ka mga tao nga misaka sa Sipaka Island aron mamalandong ug gilaumang mosaka pa ang ihap ning tuig 2016. Sagad sa mga mibisita nagikan sa nagkalain laing dapit sa Mindanao sama sa General Santos City, Iligan, Bukidnon ug uban pa. Maabot nimo ang tumoy sa Sipaka apan imong maagian ang mga istasyon sa cross nga adunay 1.5 kilometro ang kalay-on.
Didto sa tumoy maabot nimo ang pinakadakong cross o ika 14 nga istasyon ug didto nimo matagamtaman ang huyohoy sa hangin ug madayeg ang kaanindot sa palibot. Ang overlooking nga palibot diin makita ang Gingoog Bay, sa likod nga bahin malantaw ang tabok nga isla sa Camiguin ug lakip sa makita ang Mantigue Island sa lungsod sa Balingoan. Sa lugar makahinuktok ka ug tinoud nga makapamalandong.
Dili usab problema ang ilimnon tungod kay adunay libre nga tubig sa ibabaw apan gi-awhag gihapon ni Cayetuna nga ang mobisita ug mamalandong nga modala sa ilang kaugalingon nga pagkaon labina gidili na sa ibabaw ang mga mamaligyaay. Sa ubos adunay mga lokal nga produkto nga mapalit.
Alang sa mga bout mamalandong sa isla sa Sipaka ang mga mosunod nga skedyul sa Holy Week ang angayan obserbahon. Sa Miyerkules Santo, adunay misa nga ipahigayon sa alas 3:00 sa hapon. Adlawng Huwebes adunay station of the cross sa alas 6:00 sa buntag paingon sa alas 6:00 sa gabii ug pagkagabii sa ibabaw sa Sipaka adunay mahitabo nga Film Showing.
Kung anaa paka sa kalibog kung asa obserbahon ang mahal nga adlaw, ayaw na og duha duha sa pagpili sa Sipaka.
Ang mga hulagway nga makita uban niining artikulo nakuha gikan sa Facebook account sa Talisayan Lungsoranon ug kang Joenel Torremoro.