Kapitolyo nangayog exemption sa Comelec

KAGAMHANAN sa lalawigan sa Sugbo nangayo og exemption sa Commission on Elections nga makagamit og pundo gikan sa panudlanan niini tungod sa election ban sugod niadtong Enero 10 alang sa padayon nga pagpatuman sa pipila ka mga programa.

Samtang, nagpaabot si Bise Gobernador Agnes Magpale sa tubag sa Comelec sa kaulohan, nisuwat usab kini sa Commission on Audit ug nangayo og pagtugot nga mapadayon ang mga programa.

Kini naglakip sa Halad sa Gugma Alang ni Lolo ug Lola, medical/dental missions, livelihood skills trainings ug supplementary feeding alang sa kabataan nga kuwang og timbang.

Si Magpale niingon nga tibuok tuig ang pagpatuman sa naasoy nga mga programa hinungdan nga nangayo sila og exemption sa Comelec.

Matod niya aron malikay nga mapasa­nginlan sa ilang mga kaatbang sa pulitika nga sila nipahimulos sa mga programa a­ron makakuha og suporta gikan sa mga mo­lup­yo sa lalawigan, dili na sila mokuyog si Gobernador Hilario Davide III sa pagpahigayon niini sa nagkalainlaing mga barangay.

“Basta ang among desisyon, ipadayon namo. Pero dili nami mokuyog. Dili nako mokuyog para dili ma-politicize,” padayag ang bise gobernador sa pakighinabi sa mga tigbalita.

Sa Halad sa Gugma Alang ni Lolo ug Lola, ang mga senior citizen makadawat og mga delata nga gatas, bugas ug uban pa gikan sa Kapitolyo. Kini nagsugod sa 2014.

Gikan sa Enero hangtod sa Disyembre sa niaging tuig, labing minos 26,851 ka mga senior gikan sa 156 ka mga barangay sa lalawigan ang nakapa­hi­mulos sa programa.

Karong tuiga, ang Kapitolyo nigahin og P15.95 milyones sa pagpatuman sa programa nga gikan sa Provincial Social Welfare and Development Office (PSWDO).

Si Magpale, presiding officer sa Sang­guniang Panlalawigan sa Sugbo, nisuwat ni Lolita A. Mercedes, team leader sa COA, niadtong Marso 2, 2016 ug nipahibawo sa mga programa nga padayon nga ipatuman sa provincial government taliwa sa election ban.

Kini isip pagtamod sa Circular 2013-004 sa COA pinetsahan og Enero 30, 2013, nga nagmando sa tanang ahensiya sa gobiyerno ug local government units sa pagduso sa ilang listahan sa mga on-going projects ug mga programa o kalihukan ug sa mga ipatuman sa kasamtangan nga tuig.

Ubos sa Section 9 sa Resolution 9585 kun rules and regulations governing ban on public works and release, disbursement and expenditures of public funds...” nalatid nga dili sakop sa Section 261 (v) ug (w) sa Omnibus Election Code, ang mga proyekto/programa/kalihukan nga ipatuman sud sa Marso 25, 2016-May 8, 2016 nga nahimo na ug nataho ngadto sa COA subay sa Item 2.1 sa Circular No. 2013-004.

Kinahanglan nga dili himuon nga kon­disyon ang pagsuporta o pag-indurso og mga kandidato o party-list organizations ug partido alang sa mga makabenepisyo sa PPA ug kinahanglan nasayod usab ang publiko bahin niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph