BUOTAN. Mga kamot naghiusa ilabina panahon sa ting-ani. Pinamungajan gikan sa pinamuhoan silbing pahat sa kakugi. Lungsod naistablisar sa 1815 panahon sa mga Katsila. Dunay 26 ka barangays nga magpiyesta Mayo 5 sa patron Santa Monica nga mopasundayag sa Pamuhoan festival. Sagad panginabuhi ang panguma ug panagat.
Atraksyon ang Kamangon Cave sa Lamac. Matahom nga baybayon. Sulod sa daghang katuigan gihuptan sa mga Yapha. Wala molarag ang tinguha mao nay nagtimon sa renda sa lungsod si Mayor Glenn Baricuatro. Inanay nga nanugdon ug namatog ang kalamboan.
Lungsod ang Mandaue sa 1638. Nahimong siyudad sa Agusto 30, 1969 pinasikad sa Republic Act 5519 nga giaprobahan ni Pres. Ferdinand Marcos. Highly Urban City sa 1991. Adunay 27 ka barangays nga magpiyesta Mayo 8 ubos sa patron San Jose sa ilang Mantawi festival. Bagon nga mikatap nga gitawag og Mantawi apan napuo pagpanapli sa katuigan. Sa paglakat sa nobenaryo dunay Panagtagbo festival, Miss Mandaue, Mr. Mandaue ug Inter-Barangay Sports. Comparsa niadtong 2010 nga naghulagway sa kaadunahan sa kagahapon. Silhig festival sa Paknaan matag Pebrero 1. Kabayo festival sa ikaduhang semana sa Pebrero. Pasigarbo sa CICC kada Agusto 13 nga panagsangka sa mga festivals sa tibuok probinsya apan wala na sagopa sa Kapitolyo gikan sa 2013. Sinulog atol sa hubo ni Señor Santo Niño sa Enero. Pasyon ug pagkabanhaw sa kamatayon ni Kristo sa 1973-1975 apan nahunong. Bantog ang produktong bibingka nuntan sa kinaham nga binangos, tagaktak ug masareal. Talan-awon ang tinagik sa kinaiyahan ang Monkey Caves, Cansaga Bay, Butuanon River, Casili Hills, Jagobiao Spring, Cabancalan-Banilad Sinkholes ug Mahiga Creek.
Makasaysayanon ang Bantayan sa Hari, San Jose National Shrine, Presidencia, Ouano Wharf, Mandaue Salt Beds, Eversley Child Sanitarium, Rizal-Bonifacio Memorial Library, Bathan Press, San Miguel Brewery ug CICC. Gidugtong sa duha ka mga taytayan, ang tulay padulong sa pagbusilak sa ting-usbawan.
* * *
Nasinati ang kahuot sa trapiko gumikan sa nagtubo nga ekonomiya. Sulbad sa maong suliran ang pagpalapad sa karsada, paghawan sa sidewalk, flyover, skyway, coastal road, taytayan, BRT, MRT, LRT, diversion road, expressway ug trans-axial highway. Busa sayop ang pagbabag sa duha ka mga flyover sa amihanang dakbayan sa Sugbo nga gigahinan og P600M ug sayop usab ang Minglanilla nga mibalibad sa P400M flyover nga gitanyag sa DPWH gikan sa Ward I ngadto sa Ward 4. Sa miaging tuig ang DPWH nagpalapad sa kadalanan sa gahin nga P604.5M sa Banilad-Talamban Corridor, NG Escario Ext., M. Velez St., Archbishop Reyes Avenue, F. Sotto Drive ug MJ Cuenco Avenue. Dinhi na unya mohaom ang Road Revolution ug Green Loop.
* * *
Sugo sa katapolan sa gobyerno manguha og mga private service provider nga makadugang lang sa gasto. Makaguba sa katuyoan sa gobyerno nga mao ang serbisyo samtang ang pribado mao man ang negosyo. Sama sa kontrata tali sa paglukat og police clearance nga dakog bayranan ug towing company nga gamay ra ang mapunta sa gobyerno samtang dako ang pahat sa pribadong kompaniya. Maong mangalsa og sakyanan bisan giparking tongtong sa gutter, kilid sa poste, haligi ug kahoy nga dili agianan og sakyanan tungod lamang sa pangwarta. Apan kadtong nahanaw nga resibo sa sedula sa siyudad sa Sugbo nga mokabat og P50,000 labing seguro maneobra sa mga kawani sa gobyerno.
(csa_1156@yahoo.com/0905-250-4643)