TULO ang dead on the spot samtang 20 ka mga tawo ang samaron human nahulog sa pangpang ang usa ka elf truck alas 6:15 sa buntag niadtong Biyernes Santo sa likuong bahin sa Barangay Santiago, Caraga, Davao Oriental.
Sa impormasyon nga nakalap sa Sun.Star SuperBalita, nasayran nga ang maong trak dunay plaka numero LGG-957 gimaneho sa usa ka James Marfe Antolin, taga Sto Tomas, Davao del Norte.
Duna kini 24 ka sakay nga padung unta sa Aliwagwag Falls sa Cateel, Davao Oriental.
Apan samtang nagdagan ang truck sa likuong bahin, giingong nagka-problema ang preno nga miresulta sa pagkabangga niini sa steel railing ug nahug sa pangpang nga dunay gitas-ong 30 ka dupa.
Sa Facebook post ni Nathaniel Case Quinones, giingon nga ang mga namatay mao sila Bryan Tuba Cano-og, 18; Vicente Malayan, 30; ug Ian Matildo, 21, pulos nagpuyo sa Tagum City.
Dali sab nga gipangdala sa Davao Regional Hospital ang baynte uno ka mga samaron diin ang uban nakagawas na kinsa nakahiagom lamang og gagmay nga bun-og sa kalawasan.
Giingon nga halos taga Tagum City ang mga sakay sa truck ug padung unta sila mag-outing aron motamod sa Semana Santa.
Ning kasamtangan gitun-an pa sa kapulisan sa Caraga ang matudlong sad-an sa panghitabo.