NAHIMUTANG karon sa delikadong sitwasyon ang defending champion San Antonio Spurs human kini bawsi kagahapon sa Los Angeles Clippers, 102-96, didto mismo sa ilang korte.
Si Blake Griffin mipahagsa og 26 puntos ug 12 ka rebounds samtang si Chris Paul adunay 19 puntos ug 15 ka assists alang sa Los Angeles Clippers aron pagtabla sa series, 3-3.
Si Marco Belinelli mipabuhagay og duha ka 3-point shot sa katapusang 80 segundos usa niini sa nahabiling 14 segundos aron pagtapwas sa labaw sa Clippers, 98-96.
Apan gitubag kini og duha ka free throws ni Jamal Crawford aron pagselyo sa kadaugan nga maoy naghatod ngadto sa deciding Game 7 ugmang adlawa didto sa Los Angeles.
Si J.J. Redick midugang og 19 samtang si DeAndre Jordan mipuga og 15 puntos ug 14 ka rebounds alang sa Los Angeles.
Sa laing playoffs, hingpit nga nakakuha og luna ang Chicago Bulls sa sunod round pinaagi sa saktong pagdispatsa sa Milwaukee Bucks, 120-66, sa Game 6 sa ilang series.
Ang Bulls nga maoy makigsangka sa Cleveland Cavaliers sa second round, nakuwangan og upat ka puntos aron ilang matupngan ang NBA playoff record nga pinakadakong winning margin.
Ang maong record nakulit niadtong Marso 19, 1956 sa dihang gipildi sa Minnesota ang St. Louis, 133-75.
Bisan tuod og naklaro na ang kadaugan sa Bulls sa sayong bahin, apan nagpadayon gihapon ang intensity sa duwa nga maoy midayandayan sulod sa lima ka duwa sa maong series.
Gani si Dunleavy nakakuha og grabing foul gikan ni Guiannis Antetokounmpo kinsa gipahamtangan og flagrant 2 foul sa wa pa ang halftime.