KARON nga nagsugod na ang campaign period alang sa mga lokal nga kandidato, usa ka special local survey sa dakbayan sa Mandaue ang gihimo aron masuta kon kinsa para sa mga Mandawehanon ang pilion nila nga kandidato kon nahitabo pa ang eleksiyon sa maong survey period.
Ang maong pre-election survey gihimo kini gikan sa Marso 10 ngadto sa 12 sa Social Weather Stations (SWS) sa 600 ka respondents nga botante sa dakbayan sa Mandaue.
Si Atty. Victor Rodriguez, usa ka negosyante mao ang ni-sponsor sa maong survey.
Base sa survey gipangutana ang respondents kon kinsa ang botaran niini nga mayor, bise-mayor, kongresista, bise gobernador ug gobernador kon nahitabo ang eleksiyon sa maong mga adlaw.
Sa maong survey, nakuha ni Liberal Party Mayoralty Candidate Luigi Quisumbing ang mayoriya sa botos sa 49% itandi sa kaatbang niini sa One Cebu nga si Lolypop Ouano-Dizon diin anaa kini 40% nga boto.
Samtang nakuha usab sa running mate ni Quisumbing nga si Atty. Carlos Pontico Fortuna kinsa nanguna sa vice mayoralty race sa 45%.
Ang mga kaatbang niini nga sila si Toben Andaya (One Cebu) nakakuha og 30% nga boto ug Estanislao Sanchez Jr. (Independent), sa 6%.
Si incumbent Mandaue City Mayor Jonas Cortes (LP) usab ang nanguna isip kongresista sa 61% nga boto itandi sa kaatbang niini nga si Paulus Cañete (One Cebu) sa 15%.
Alang sa gubernatorial race, nanguna si incumbent Cebu Governor Hilario Davide III (LP) sa 34%, gisundan ni Winston Garcia sa 23% ug Klasmit Boyet Cortes (IND) sa 12%.
Samtang si Nerissa Soon-Ruiz usab ang nanguna sa vice-gubernatorial race sa 43% nga boto, gisundan ni Vice Governor Agnes Magpale (LP) sa 31% ug Nene Montenegro sa 2%.
Ang dakbayan sa Mandaue aduna’y 189,712 ka mga rehistrado nga botante alang sa umaabot Mayo 9 nga eleksiyon, ang labing dako nga sakop sa probinsiya sa Sugbo.
Atol sa maong survey, gipangutana ang mga respondent sa survey question ug gihatagan kini sa lista sa kandidato base usab sa opisyal nga lista sa Commission on Elections (Comelec).
Matod ni Rodriguez ning nahinabi sa Sun.Star Superbalita kagahapon nga gusto niini ug sa mga higala niini nga mga negosyante mahibawo ang sintemyento sa Mandawehanon hilabi na sa socio-economic nga habig.
Dugang niini nga agi na usab kini nila’g suporta kang Quisumbing kinsa suod niya nga higala, “support din kay Luigi, kasi you know, nag-iiba na yung fundamentals of campaigning. Yung kay Luigi, he is a good guy, he has a vision and heart for Mandaue.”
Nasuta ning mantalaan nga ang kompaniya diin konektado si Rodriguez, anaa mahimutang sa dakbayan sa Mandaue mao nga didto usab gihimo ang maong survey.
Gikalaro hinuon ni Rodriguez nga bisan og nisuporta kini kang Quisumbing, wala kini nagpasabot nga nisuporta na siya sa kinatibuk-ang LP, “Just to clarify once more, I’m not a member or supporter of LP, my choices for President and VP are Digong Duterte and Bongbong Marcos.”