MIARANGKADA na ang nasyunal ug lokal nga kampanya sa politika.
Di mapugngan ug sa sunod nga 45 ka adlaw aduna na kitay mga bag-ong mamunuan sa
nasud og sa lokal nga kagamhanan.
Lain na ang mopuyo unya sa Malacanang hasta ang mga opisina gikan sa kaulohan
hangtod sa pinakasuok nga lungsod sa Pilipinas.
Dinhing hugnaa mahibal-an ang gitas-on sa pisi sa matag kandidato.
Ang dunay daghang pundo makalahutay pa sa pagpa-ads sa radyo, TV ug newspaper ug
makapangampanya pa sa mga probinsya nga wa nila maadtoi.
Ang mga wa nay pundo, mopahulay lang una og maglibot-libot na lang sa mga sentro
kay di na kaya sa bulsa.
Sa pagkatinuod, daghan pang gastuhon ang kandidato gawas sa personal nga
pangampanya. Kinahanglan pa niining mogasto sa mga poll watchers, abogado ug
daghan pang uban.
Dili lalim ang mokandidato sa nasudnon nga pwesto kay kung pwede pa lang motago,
motago na ang mga kandidato sa kadaghan sa mangayo og tabang kanila.
Mao bitaw nga sagad kanila kay “dali duolon apan lisod pangitaon” ilabi na kung
nakadaug na.
Sa tanang nanagan pagka-presidente, si Mayor Rody Roa Duterte ang gamay ra’g
sapi.
Sa dihang hapit na siyang modagan, iyang gipaklaro nga di siya modawat og sapi
gikan sa mga dagkong negusyanteng Insik og ni bisan kinsa nga dunay “self-
interest” sa pagtabang.
Gilikayan ni RRD nga makapangayo’g utang na loob kay sumbalikan siya sa mga
pangayo niini kung anaa na unya siya sa poder.
Busa, iyang giklaro sa iyang mga supporters nga maghimo’g inato nga porma sa
kampanya ug posters aron di makagasto og dako. Mao nga ang hiniusang pwersa sa
Davao Inventors Association (DIA), Philippine Traditional and Alternative Herbal
Medicine and Cosmetics Association (PhilTAHMCA), Sunny Point, Davao Oil Millers
Association, Davao Homeowners Association, Mindanao Islamic Chamber of Commerce,
Religious Groups, PDP-Laban, ug daghan pang grupo magpahigayon og “Dinner with
Mayor RRD” karong Abril 4 sa gabii didto sa Sunny Point, Ma-a, Davao City.
Buot niining maong kalihukan nga makatigum og kwarta nga yawat makatabang sa
kampanya ni RRD ilabi na sa pag-imprinta sa iyang mga posters ug suporta sa mga
gagmay’ng community radio stations.
Sa pagkatinuod, kulang kaayo ang iyang campaign materials ug halos tanang
nisuporta kaniya boluntaryo lang ug way bayad.
Ang mga organizers sa Hugpong Federal Movement ug PDP-Laban iya-iya og kayod
tungod sa ilang paghigugma ug tinguha nga modaug ang garbo sa Mindanao.
Ang akong igsuon nga si Willy maoy sidekick ni Butch Ramirez nga maoy advance
party sa kampanya sa Luzon.
Matud pa niya nga makalimbawot sa balahibo ang kadaghan sa tawo nga nidawat kang
RRD sa mga lugar nga ilang giadtoan. Apan sa gihapon, kapus sila sa rekursos nga
gikinahanglan kaayo.
Gidapit sa Nota Bene ang tanan nga gustong magpa-selfie ug mahimamat ni RRD sa
personal nga moapil niining maong “Dinner with RRD.”
Pwedeng makapalit og ticket sa mga organizers sa programa ug sa front desk sa
Sunny Point Hotel and Apartelle sa Ma-a. Panahon na nato karon nga motabang
kaniya. Adto ta bay!