ILIGAN CITY -- Gimando sa labing labawng opisyal sa Philippine National Police (PNP) ngadto sa mga police personnel sa Lanao del Sur ang pagpabalik kanila sa ilang matag puwesto.
Kini nga kamandoan gihatag ni PNP Director Ricardo Marquez atol sa gipahigayong stakeholders consultation sa iyang pagbisita sa lalawigan human nasang-at ang reklamo sa kakulangon sa police visibility sa probinsiya.
Matud ni Marquez nga kinahanglang mobalik ngadto sa ilang matag unit ang pulis nga kasamtangang naka-assign sa matag local government unit aron himoon ang ilang police functions ug mapahugtan ang presensiya sa kapulisan ngadto sa matag komunidad.
Dili pa lamang dugay, mipahigayon og konsultasyon si Marquez aron mapaminaw ang mga concern sa mga stakeholders kabahin sa seguridad sa probinsiya ug makahatag og giya alang sa pagpangandam sa umaabot nga eleksiyon.
Adunay 19 ka mga dapit sa Lanao del Sur ang giila sa PNP nga anaa sa ‘election watchlist’ tungod sa kainit sa away sa pulitika ug hulga sa seguridad.
Tungod kay nasayod man ang nasangpit nga opisyal nga dili magmalampuson ang piniliay kung wala ang tabang sa katawhan sa dapit, mimando kini ngadto sa PNP Provincial Office nga makiglambigit sa katawhan sa komunidad ilabina sa pagmugna sa ilang ‘election security plan’.
Mahinungdanon, matud pa, ang partisipasyon sa publiko sa pagmugna og malamboon nga komunidad o dapit.