STA. CRUZ, Davao del Sur -- Giangkon sa Philippine Air Force (PAF) nga
naglisud sila sa pagpawong sa sunog palibot sa Mt. Apo.
Hinuon, naningkamot ang PAF nga di mokanit sa baby Apo ang kalayo ug mga
punoan sa Almaciga Century tree nga maoy landmark sa Sibulan trail.
Kompiyansa sab sila nga mapawong sa dili madugay ang kalayo pinaagi sa
hiniusang air ug ground operations.
Migamit na og mga dugmok nga ice gikan sa planta, inay tubig ang helicopter
aron nga ibubo sa kalayo.
Si Lieutenant Colonel Jose Ritchie Pavelona, commander sa PAF-Tactical
Operations Group Davao Region, nagbutyag nga usa sa nakapalangay sa ilang
operasyon ang baga kaayong gabon palibot sa bulkan mao nga kinahanglang
motugpa og pipila ka oras ang chopper.
"It depends on the weather condition because it is dangerous and it would
be unsafe if they would not halt the operation," sulti ni Pavelona.
Nanghinaut sab ang PAF nga maklaro sa mga volunteers kon asang bahin ang
sunog aron maigo gayud sa tubig gikan sa helicopter.
Kahibaloang mialma ang mga volunteers human nasakitan dihang sila maoy
nakaligo sa tubig nga giyabo sa helicopter ug napiskan sab sa baga ang
ilang panit.
Nabalaka sab ang Department of Tourism (DOT) kon magpadayon ang bush fire
kay dako kining epekto sa natad sa turismo ug labaw sa tanan, ang nahanaw
nga mga endemic ug endangered specie sa bukid.
Mas gikabalak-an nila ang protected area nga Mt. Talomo ugaling maabot sa
kalayo kay kini maoy tinubdan sa tubig sa Davao City.
Gikansela na sab ni Mayor Joel Ray Lopez ang tinuig nga Mt. Apo Boulder
Face Challenge nga ipahigayon unta karong bulana.
Matud ni Lopez gikinahanglan og taas nga panahon ang rehabilitasyon sa Mt.
Apo pinaagi sa pagpananum og kahoy atol sa ting-uwan.
Giangkon sa mayor nga apektado ang ilang turismo sa kanselasyon sa
aktibidad apan wa silay mahimo sanglit angayang luwason ang Mt. Apo.
Nagpadala na sab og dugang pagkaon ug tubig ang lokal nga kagamhanan alang
sa mga rescuers.
Samtang si Davao del Sur Governor Claude Bautista padayong nagmonitor sa
operasyon sa Provincial Disaster Risk Reduction and Management Council
(PDRMMC).
Nagpadala sab ang kagamhanang probinsiyal og mga ayudang pagkaon ug uban
pang kinahanglan aron mapawong ang sunog sa bulkan. (OBD)