BINASI sa Mga Buhat 5:12-16; Salmo 118; Gipadayag 1:9-13, 17-19; ug Juan 20:19-31
Dominggo karon sa Divine Mercy, usa sa labing kinaham nga debosyon sa Simbahan. Makita bisag asa ang larawan sa maluluy-ong Jesus nga maoy gigikanan sa mga bidlisiw sa kaluoy. Popular kaayo ni. Mao usab kini ang ikaduhang Domingo sa panahon sa Pasko sa Pagkabanhaw ni Jesus.
Nagsugod ang maong debosyon didto sa Poland pinaagi sa usa ka madre, si Sister Faustina Kowolska nga namatay sa 1938. Nasugdan kini usa nahitabo ang World War II diin minilyon ang mga nangamatay. Tataw kaayo nga ang atong kasamtangang panahon ug kalibotan nanginahanglan kaayo sa kaluoy sa Dios.
Giduso ang maong debosyon sa usa ka obispo sa Poland. Kining maong obispo nahimong Papa Juan Pablo II ug iyang giduso ang Divine Mercy sa tibuok kalibutan. Siya ang nagpasiugda sa Divine Mercy Sunday.
Makaluluoy kaayo ang mga disipulo ni Jesus human siya gipatay ug gilubong. Gani mingtago sila sa sulod sa usa ka lawak nga gitrangkahan tungod sa ilang kahadlok sa mga mipatay sa ilang magtutudlo. Mipakita si Jesus kanila ug iya silang gitayhopan sa Espiritu Santo ug gihatagan og gahom ug misyon sa pagpasaylo sa sala sa tawo.
Kaluoy ang gipakita ni Jesus sa mga disipulo. Gihatagan niya silag kalinaw sa ilang nagkalandrakas nga kahimtang. Gihiuli niya ang mga napakyas nga pangandoy pinaagi sa pagbuntog sa kamatayon. Unya gihimo niya silag mga instrumento sa pagpakuyanap sa iyang kaluoy. Mabasa kini sa ebanghelyo ni Juan.
Gipakuyanap ang maong kaluoy diha sa mga Buhat sa mga Apostol. Kon unsay gihimo ni Jesus, sama sa pagpang-ayo sa mga masakiton, mao say gihimo sa mga apostol. Tugod niini, midaghan ang mga tumutuo ni Jesus.
Layolayo ang naabtan sa mga disipulo ni Jesus, tinukmod sa kaluoy nga iyang gipaambit kanila. Usa sa mga tumutuo miabot sa Patmos, diin gisuwat ang libro sa Gipadayag. Didto nakakita siya sa Anak sa Tawo, si Jesus nga namatay apan buhi na hangtod sa kahangturan. Adlawng Domingo kadto. Libro sa kaluoy sa Dios ang libro sa Gipadayag kansang kasaysayan nagpadayon sa kasamtangang panahon.
Nagapadayon kita nga nanginahanglan sa kaluoy sa Dios. Daghan pa gihapon ang kagubot nga atong gisagubang. May mga pundok nga mamumuno sama sa ISIS nga di pa dugay mipatay sa upat sa mga made ni Beata Teresa sa Kalkuta. May mga nasod nga mitugot sa pagpatay sa mga tawo kun euthanasia.
Naa say umaabot nga piniliay nga, sa pagkakaron, daghan kaayong mga dikristohanon nga mga buhat. Taliwala niining tanan, nagpabilin ang daghan kaayong mga kabos nga gipanggutom, way eskuwela, ug way trabaho. Nanginahanglan og diosnong kaluoy ang kalibotan.
Puy-an ta ang tawag sa Divine Mercy Sunday.