Barrita: 10 Commandments gamiton sa pagpili?

SI Archbishop Socrates Villegas sa Lingayen-Pangasinan mi­awhag sa mga Katolikong botante pinaagi sa usa ka pastoral letter niadtong Biyernes sa paggamit sa Ten Commandments, ang Napulo ka mga Sugbo sa Diyos sa Biblia, sa pagpili sa mga kandidato sa eleksyon karong umaabot Mayo 9.

Si Villegas, nga mao usab ang pangulo sa Catholic Bi­shops’ Conference of the Philippines, niingon, “Use the age-old standards set by our Ju­deo-Christian tradition —the Ten Commandments —in assessing the worthiness of the candidates for local and even more for national positions.”

Apan ang pangutana mao, aduna kahay bisan usa ka kandidato sa umaabot nga eleksyon nga mopasar sa Ten Commandments?

***

Si Villegas niingon nga kinahanglan kitang pahinumdoman sa atong milabay nga mga kasaypanan sa pagpili og mga lider nga nahimong kawatan sa kaban sa gobyerno, mipatay sa oposisyon ug nangahimong bilyonaryo gikan sa pundong pangpubliko.

Ang mga Katoliko kinahanglang mobotar, di pinasikad sa kinsay nag-una sa survey, apan subay sa ilang tanlag o konsensya ug pagpangaliya. “Your vote can make heaven come down and make our country beautiful and good as God desires it,” matod pa niya.

Ang unang sugo, “You shall not have strange gods before me,” matod pa ni Villegas, giya sa usa ka Katolikong botante sa di pagbotar niadtong usa ka atheist, sa di motuo sa Ginuo ug niadtong magbugal-bugal sa ngan sa Ginuo. Kinahanglan usab silang bukas sa mga kandidato nga si Katoliko.

***

Ang ikaduhang sugo, “You shall not take the name of the Lord your God in vain,” kinahanglang mogiya sa mga botante sa di pagbotar niadtong mga kandidato nga wa motuman sa ilang nga saad.

Samtang sa ikatulong sugo, si Villegas niingon nga tan-awon kon ang kandidato, pinaagi sa iyang kinabuhi, nagpakita bag pagtuo sa Ginuo. Ang ikaupat nga sugo, “Honor your father and mother,” dunay kalambigitan sa mga political dynasties sa atong nasud, mao nga usa ra ka pamilya ang manghawod sa usa ka dapit bisan pa kon dunay lain nga kwalipikado.

Samtang ang ikalima ug ika-unom nga mga sugo, “Thou shall not kill,” ug “Thou shall not commit adultery,” mogiya sa mga botante sa mga isyu sa abortion o pagpalaglag sa batang gisabak, pagpabalik sa islot sa kamatayon, euthanasia ug extrajudicial killings, i­ngon man sa isyu sa kaminyuon ug sexuality.

Apan tingali, daghang kandidato ang mosango ning maong sugo, “Thou shall not steal,” gawas lang niadtong wa pang kahupot og puwesto. Adto na lang ta niadtong nisimba nga pagkadungog gyud niya sa “Thou shall not steal,” nisinta kay gikawat ang iyang bisikleta. Apan pag-abot sa “Thou shall not covet thy neighbor’s wife,” nikalma siya kay nakahinumdom siya kon diin mahibilin ang iyang bisikleta.