KIDAPAWAN CITY -- Unom ka mga lider sa madugo nga lihok protesta sa dakbayan sa Kidapawan ang gikatakda nga pasakaan og kaso sa korte.
Mga pasakaan og kaso mao sila Pedro Arnado, chairman sa Kilusang Magbubukid ng Pilipinas; Bai Ali Indayla, Gabriela party-list (second nominee); Jerome Aba sa Suara Bangsamoro; Norma Capuyan, chairwoman sa Apo Sandawa Lumadnong Panaghiusa sa North Cotabato; Lito Roxas sa Free Tappers Federation of Cotabato; ug Pastora Mary Joy Mirasol sa Promotions of Church Peoples' Response.
Ang unom ka mga lider gitudlo sa mga otoridad nga maoy nanguna sa lihok protesta sa mga mag-uuma sa dakbayan sa Kidapawan.
Kahinumdoman nga gitagalan og lima ka minutos ang mga nagprotesta nga mohawa sa National Highway gumikan paralisado na ang ekonomiya
sa Kidapawan City ug North Cotabato, ilabina ang dagan sa transportasyon diin nakulgot ang mga biyahero sa upat na ka adlaw nga rally.
Kalit lang nagkabinatuay, nagbinukbukay ug dunay nadungog nga mga buto sa
armas nga maoy hinungdan sa kamatayon sa tulo ka mag-uuma, 92 ang naangol ug 30 ang anaa sa kritikal nga kahimtang.
Mikabat sab sa 90 ka mga nagprotesta ang nahanaw apan migawas nga sila gipangdakop sa kapulisan ug gibalhog sa prisohan.
Moabot sab sa 102 ang naangol sa mga pulis, tulo nila ang anaa sa kritikal nga kahimtang ug gibalhin na sa Southern Philippines Medical Center (SPMC) sa Davao City.
Gikanayon sab ni Pedro Arnado, Chairman sa Kilusang Mangbubukid ng Pilipinas (KMP), sila sab magpasaka og kaso nga double murder, multiple frustrated murder, harassment ug human rights violation batok sa kapulisan ug mga lokal opisyal sa probinsiya sa Cotabato.
Sa kasamtangan, nakabalik na sa ilang mga dapit ang mga nagprotesta ug nakadala sila og bugas nga gihatag ni Action Star Robin Padilla ug uban pa nga mga nanghatag og bugas sa mga mag-uuma. (EEF)