TULO ang patay sa pagpamusil nga natigayon niaging adlaw sa Purok 3, Barangay Sinangguyan, lungsod sa Don Carlos, Bukidnon.
Ang tulo ka mga biktima giilang sila si Abraham Chan Lee Chuy, 60, nagtrabaho isip contractor; Romeo Dalo Labis, 60, minyo, usa ka bulldozer driver; ug Nestor Cailing Aclon, 48, driver.
Human sa insidente, deretsong miresponde ang kapulisan sa Don Carlos Municipal Police Station.
Basi sa imbestigasyon, nasuta nga ang tulo ka mga biktima sakay niadtong tungora sa Mitsubishi Pajero nga kolor dark green ug nagdala sa plaka nga GET 619 ug paingon niadtong tungora sa kasadpan nga bahin ug misubay sa barangay road dihang kalit lang nga gipaulanan og bala sa wala mailang mga suspetsado nga armado og wala pa matinong armas.
Ang mga biktima nakaangkon og nagkadaiyang samad sa lain-laing parte sa lawas ug dali nga gipangdala sa Sto. Niño Simbulan Hospital aron matambalanan apan gi-deklara nga dead on arrival.
Ang mga suspetsado misibat paingon sa wala matinong direksyon ug igo na lamang narekober sa crime scene ang pito ka mga fired cartridge sa gitouhang garand, usa ka live ammunition sa gitouhang garand rifle, unom ka fired cartridge sa gitouhang 12 gauge shotgun, upat ka fired cartridge sa gitouhang carbine rifle, ug usa ka fired cartridge sa M16 rifle ug buhing bala niini.
Sa pagsulat ning balita, ang kapulisan padayon pa sa pag-establisar sa motibo sa pagpatay sa mga biktima ug padayon pa nga giila ang mga suspetsado.
Ang mga narekober nga mga ebidensya sa crime scene ang gidala na niining panahona sa Bukidnon Crime Laboratory alang sa Ballistic Examination.