PADAYONG giawhag sa Cebu City Sports Commission (CCSC) ang kabatan-unan sa pagsalmot sa ilang libreng Summer Grassroots Sports Training Program 2016.
Ang training program sugdan karong Abril 18 ug mahuman sa Mayo 6.
“It’s a free summer grassroots program of Cebu City. It actually aims that we would be able to make our kids busy during summer through sports, instead of making them stay in computer shops or naa ra sila sa balay nga dili sila effective,” matod ni CCSC program coordinator Gayle Dico.
“We bring out the sports and so it will be much easier for the different barangays.”
Nanghinaot si Dico nga mas modaghan pa ang kabatan-onan nga mosalmot sa training program aron sa pagminos sa mga kaso sa drug addiction, snatching ug uban pang dautang binuhatan.
Gilauman nga moabot sa 5,000 ang mga mangapil sa programa.
Ang kalihukan gitukod sa CCSC inabagan sa siyudad sa Sugbo ug sa pipila ka mga government organization sama sa Department of Education (DepEd), Philippine Sports Commission ug Association of Barangay Councils.
Sukad sa paglingkod sa CCSC chairman Edward Hayco, mao na kini ang ikalimang tuig nga adunay grassroot sports training program ang CCSC.
Ihigayon ang training program sa 16 ka mga tunghaan ubos sa duha ka mga distrito sa dakbayan.
Sa pagkakaron, naa nay dili mominos sa 400 ka volunteer trainers gikan sa nagkalainlaing unibersidad. Hannah Mae Pinatil, CNU Comm Intern