HADUOL na ang adlaw nga mopahunong sa tanang kasikas sa politika nga atong madunggan karon.
Sa Mayo 9 mopili na usab kita'g mga "suluguon sa nasud" aron mosilbi kanato sud sa 3 ngadto sa 6 ka tuig.
Nadungog ug nasud-ong na nato sila busa karon medyo aduna na kitay listahan kung kinsa ang botohan sa lokal ug nasyonal nga posisyon. Aron makadugang sa atong listahan, nagpahigayon ang kabataan sa mga partners sa Save the Children Philippines (SCP) ug Bata Muna Campaign.
Dili kini partylist ha kon dili kalihukang elektoral sa mga bata aron mabutang sa plataporma sa kandidato ang isyu sa mga bata, ilabi na kadtong mga bulnerabli sa abuso ug kabangis sama sa trapiking, prostitusyon, batang nagpuyo sa kalsada, nagtrabaho, adunay kabilinggan sa lawas, LGBT, lumad ug uban pa.
Busa sa niaging semana naglibot-suroy ang grupo sa bata sa Mindanao Action Group for Children's Rights and Protection (MAGCRP) nga partner sa SCP sa mga istasyon sa radyo, TV ug sa mga kandidato aron madunggan ang ilang tingog isip mga sumusunod sa atong kaliwatan.
Dinhi sa Mindanao upat ka siyudad ang nahiapil sa kampanya sama sa Davao, General Santos, Ozamiz ug Zamboanga.
Sa Davao naglibot usab ang mga bata sa NAKAMATA sa Tambayan Center ug KAKASAKABA sa Kabataan Consortium/Luna sa mga istasyon sa radyo sama sa programang "Maayong Buntag Juan ug Juana" sa One Radio ug sa TV.
Gipresentar usab sa mga kabataan ang ilang isyu ug tinguha nga kalamboan sa mga lokal nga kandidato atol sa gipahigayong "Consultation for Action with Homeowners Association and Candidates”"kagahapon sa Sangguniang Panlungsod Building.
Apil sa mga tinguha sa mga bata mao ang pagpasar sa "Positive Discipline Bill" nga dugay nang natanggong sa kongreso, himuong libre ug sayon ang pagparehistro sa mga batang nahimugso, sumpuon ang malnutrisyon, trabaho alang sa ilang mga ginikanan, idili ang "early marriage", ug padaghanon ang kahigayonan aron regular nga makasalmot ang mga bata sa diskusyon ug desisyon sa gobyerno sa pagpanday og balaod, programa ug pagbadyet sa pundo. Gawas niining nasudnon nga panawagan, aduna usay mga lokal nga isyu nga ginaduso ang mga bata sa ilang tagsa-tagsa ka lugar.
Dinhi sa Davao apil sa pangandoy nga mapasar na ang "Child Protection Ordinance", katukuran sa "Special Office for Children's Concern", ug hingpit nga implementasyon sa Davao City Children's Code ilabi na sa dugang serbisyong sosyal sa mga bata.
Gawas sa isyu sa mga bata, gipasibaw usab sa mga sakop sa HOA ang ilang mga isyu aron mahatagan og kasulbaran ilabi na nga nidagan karon si Mayor Rody Duterte pagka-presidente ubos sa PDP-Laban aron iyang maaksiyonan kung ugaling palaran siyang modaug.
Lakip sa ilang mga isyu mao ang kasegurohan sa pamuyo, "condonation" sa ilang bayad, pagpaayo sa kanal, dalan, suga ug basura, ug uban pang serbisyo nga ilang gikinahanglan.
Dul-an 200 ka mga opisyales sa HOA ug 10 ka mga kandidato ang nitambong sa maong konsultasyon nga gipasiugdahan sa usab sa Luna Legal Resource Center ug sa Worldwide Filipino Alliance (WFA-PAPI). Congrats ug salamat sa inyong tabang!