NAMILIGRO ang 55 milyunes ka mga botante sa tibuok Pilipinas tungod sa nahitabong hacking sa database sa Commission on Elections (Comelec) sa sayo ning buwana nga gitawag kaorn og “Comeleak.”
Ngano man? Matod pa sa usa ka internet security company, ang identity sa maong mga botante nga lagmit naglakip kanato, mahimong gamiton sa paghimog krimen, lakip na sa electronic fraud.
Matod pa sa Trend Mircro nga nagbasi sa Tokyo, Japan nga maoy nitaho sa hacking sa database sa Comelec, ang na-leak nga data naglalkip sa mga pangan, adlawng natawhan, pinuy-anan, e-mail, pangan sa mga ginikanan ingon man detalye sa mga pasaporte ug text markers sa fingerprints sa kapin sa 55 ka milyon ka mga botante.
***
Unsa man kaha ang epekto sa hacking sa database sa Comelec sa umaabot nga eleksyon sa Mayo 9? Di kaha kini magamit sa pagtikas sa piniliay?
Si James Jimenez, ang tigpamaba sa Comelec, niingon nga ang automated election magsubay sa laing server, ug di kadtong server nga na-hack, busa wa mahimutang sa peligro ang eleksyon.
Delikado man gud nga dunay magduda sa resulta sa eleksyon, ilabi na nga sikit kaayo ang resulta sa mga survey tali sa mga kandidato sa pagkapresidente nila ni Davao City Mayor Rodrigo Duterte, Senador Grace Poe, Bise Presidente Jejomar Binay ug Mar Roxas.
***
Ang Comelec niingon nga adunay 54.3 milyunes ka mga rehistradong botante sa Pilipinas ug 1.3 milyunes nga overseas voters.
Ang Trend Micro maoy unang nitaho nga gi-hack ang databse sa Comelec niadtong Abril 6 sa unng pundok sa mga hackers. Ang ikaduhang pundok sa mga hackers ni-post sa tibuok nga database online, lakip sa mga mirror links diin ma-download ang tanang data.
Apan ang Comelec niingon nga ang nakuha mao lang ang mga text markers ug di ang mga fingerprints. Ang text marker di makasundog sa mga fingerprints.
***
Ang Trend Micro niingon nga tungod sa hacking, ang matag botante sa Pilipinas nahimutang sa peligro sa electronic fraud.
Sanglit ang eleksyon sa Pilipinas electronic na man, si Danny Arao, usa sa mga organizers sa election watchdog nga Kontra Daya, niingon nga ang na-hack nga data mahimong magamit sa mga flying voters.
Si Arao niingon nga anaa lang gihapon ang mga flying voters ug possible nga kawaton ang identity niadtong wa na mobotar o kaha niadtong mga botante nga patay na.