NAKA COVER ko sa final meeting sa Regional Joint Security Center nga gilangkuban sa mga ahensiya sa gobyerno alang sa umaabot nga piniliay. Nag-una mao ang Comelec, PNP ug AFP. Wa mi makapaminaw sa kinatibuk-ang meeting apan gihatagan mi og higayon pagpangutana sa dayon nang paniudto sa mga opisyal nga nanambong. Unang nitingog mao si Atty. Jose Nick Mendros, regional director sa Comelec. Iyang gipalanog nga 100 percent na nga andam ang iyang buhatan pagpahigayon sa piniliay karong Mayo 9. Sa iyang bahin, si C/Supt. Patrocinio Comendador Jr., direktor sa kapulisan sa Rehiyon 7, nitug-an nga may gisubay sila karon nga armadong grupo nga
mahimong sagabal sa kalinaw ug kahusay atol sa piniliay. Samtang si Col. Arnulfo Matanguhan, commander sa 302nd Infantry Brigade sa Philippine Army, niluwat og pasalig nga ang iyang tropa andam na sab pagsanta sa mga armadong grupo nga magsamok samok sa piniliay kauban ang kapulisan. Nangutana ko niya kon ang puersa sa militar nga iladlad atol sa eleksiyon parehas ba anang makita nato sa telebisyon nga padung mosung sa mga rebelde bitbit ang mga tag-as nga kalibre sa armas. Ang iyang tubag ang naandan lang nga postura sa mga sundalo nga mag-duty atol sa piniliay. Bisan kon wa ni malakip sa iyang gisulti, nahibawo ko nga gawas sa mga sundalo naka standby sab ang uban nilang asset.
Oratio
Kon nakabantay mo nga dunay mga higayon nga makasinati kita og mga pag-ulan sa nakalabayng mga adlaw ug gabii. Di hinuon dugay ug di sab kusog. Kini taliwala sa grabing kainit sa panahon nga atong nasinati. Ako nga naabtan og duha ka higayon ning maong pag-ulan, nakapangutana kong mao na ba ni ang resulta sa bag-ohay palang nga gisangyaw nga pag-ampo sa simbahang Katoliko nga Oratio Imperata. Ang pangaliya sa ulan. Tinuyo nga pag-ampo pagpangayo ug ulan gikan sa Labawng Makagagahom. Sa ABS CBN, si Edgar Gutierrez, anchor sa dyAB, nihubad sa maong pag-ampo sa pinulongang Binisaya ug gisibya matag karon ug unya sa maong sibyaanan. Kon paminawon nimo og maayo si Edgar, makapanlibawot sa balhibo ang maong pag-ampo. Gani daghan na ang gustong makabaton og kopya sa maong pag-ampo kay ilang iapil sa ilang mga pag-ampo diha sa ilang panimalay ug kapilya. Mosulay ko og pakopya ug daghan pinaagi sa CD para mahatagan kadtong nangayo nako. Nindot ni nga paagi inay madunggan lang nato sa sibya sa radyo o sa simbahan, mapadungog sab diha sa mga panimalay ug kapilya. Way komo sa pag-ampo. Ang pag-ampo maoy lig-on nga hinagiban batok sa bisan unsa nga pagsulay. Di sayon kining giatubang natong krisis sa tubig. Seryoso kini ilabi na sa kabukiran kansang mga umahan nangliki tungod sa kainit. Ang dakong pildiro mao ang atong mga igsuong mag-uuma.