MAS gipanghingusgan pa sa Department of Environment and Natural Resources (DENR) 7 ang pagprotehir sa kalikupan lakip na ang kadagatan ning buwan sa Mayo diin gipahinungod kini sa ahensiya alang sa paghatag og dugang pagtagad sa Month of the Ocean.
Nasayran nga sagad ang summer season hilabi na ang buwan sa Mayo mao ang tigpangitlog sa mga isda ug usa sa padayon nga giprotektaran karon sa nagkadaiyang ahensiya sa gobyerno sa Central Visayas ug sa silingang mga rehiyon mao ang Tañon Strait Protected Seascape (TSPS).
Ning pagsaulog sa DENR, Department of Agriculture, Bureau of Fisheries and Aquatic Resources sa Month of the Ocean dala ang tema nga “Buhay Dagat, Buhay natin.”
Usa sa ilang gitudlo mao ang grabe nga pag-abuso sa kadagatan sa Tañon Strait diin daghang commercial fishing boat ang mangisda sulod sa dugay nga panahon hinungdan nga minus na ang makuha sa mga yanong mananagat.
Nagkanayon si Mario Aragon, pangu sa Conservation and Development Division sa DENR 7 nga usa sa gipanghambog sa Kabisay-an kining presensiya sa dolphins ug whales nga gani 14 sa 29 ka nga species niini ang makita sa Pilipinas.
Gipasabot niini, ang Tañon Strait ang pinakadakong Marine Protected Area sa nasud ug major fishing ground gani niadtong Mayo 1998 pa kini gideklarar nga Protected Area nga naglangkob sa pito ka siyudad, 35 KA munisipalidad ug 298 ka mga coastal Barangay sa Probinsiya sa Sugbo, Negros Oriental ug Occidental.
Giangkon ni Forester Percival Fiel sa DENR dunay gyuy lokal nga kagamhanan ang dili motabang kanila sa pagsikop sa mga illegal commercial fishing vessels ilabi na ning naghinangat nga piniliay.
Tungod usab sa nagkalain-laing balaod o ordinansa nga gipatuman sa Barangay, Munisipyo ug siyudad hinungdan nga gipaningkamutan nila karon nga mahusay ug makab-ot ang kasabutan uban sa BFAR.
Sukad sa niaging tuig, adunay upat ka mga fishing vessels ang nasikop tungod sa ilegal nga pagpanagat ug 55 ka mga tawo ang napasakaan na og kaso sa DENR.