GIKOMPIRMAR ni Gilas Pilipinas coach Tab Baldwin nga moapil si Bobby Ray Parks Jr. sa national training pool alang sa Fiba Olympic Qualifying Tournament karong umaabot nga Hulyo.
Nagkanayon si Baldwin nga gilaumang mosalmot si Parks inig sugod sa training camp sa Gilas karong Mayo 18.
“I’ve included him in the pool,” matud sa American-Kiwi nga coach, kinsa maoy naggiya sa Gilas aron makabaton og silver medals sa Fiba Asia Championship ug ang William Jones Cup sa miaging tuig.
Si Parks, 23, sakop sa Gilas Cadets squad nga nakadaug og gold medal sa Southeast Asia Basketball (SEABA) sa miagi sab nga tuig.
Wala na miduwa si Parks sa Gilas alang sa Southeast Asia Games gumikan kay milarga kini sa Amerika aron ipadayon ang paggukod sa iyang pangandoy nga makaduwa sa National Basketball Association (NBA).
Nagpa-draft siya sa miaging tuig sa NBA apan wala’y team nga mikuha kaniya apan nakadawat siya og tanyag aron moduwa sa Summer League ubos sa kampo sa Dallas Mavericks.
Sa padayon niyang pagpanikaysikay, si Parks nakapirma og kontrata sa Texas Legends sa NBA D-League diin nag-average siya og 4.6 puntos ug 1.9 rebounds.