Molupyo giawhag nga magpundo og tubig

GIPASIDAN-AN ang matag barangay sa dakbayan sa Lapu-Lapu nga magpundo og tubig ning panahon sa ting-init sa kabalaka nga mahubas ang water supply gumikan sa nasinating dry season.

Subli nga gipahinumduman ni Mayor Paz Radaza ang matag barangay gawas nga magpundo og tubig, gikinahanglan nga di usikan ang tubig ning panahon sa summer.

Mipadayag ang opisyal og kabalaka ilabi na nga adunay pipila ka dapit sa probinsiya sa Sugbo ang nakasinati og dry spell ug nagkuwang ang supply sa ilang tubig.

Gipahibawo sa mayor nga wa pay barangay sa Lapu-Lapu nga nakasinati og water crisis ingon man ang kakuwang sa supply gikan sa Metro Cebu Water District (MCWD).

Apan gitutokan karon ang barangay Caubian sakop sa isla sa Olango nga unang gikatahong adunay paghubas sa ilang mga tabay nga maoy kuhaan sa ilang pagpanglimpyo ug kaligo samtang alang sa ilang imnunon mopalit ang matag lumolupyo og bottled water.

Pabilin usab nga nag-monitor ang city health sa posibleng diarrhea outbreak resulta sa kakuwang sa supply sa tubig.

Mipasalig si Radaza nga andam ang siyudad sa pagtunol og ayuda ngadto unya sa apektadong barangay nga mahubsan sa ilang water supply pinaagi sa pagpadala og water tanker sa affected area.

Tambag sa mayor nga kon adunay higayon nga mokalit og uwan mas bentaha nga magsawod og rain water nga kasamtangan magamit sa pagpanghugas, kaligo ug uban pa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph