NAGBAKHO sa hilom si PDP-Laban presidential candidate Mayor Rodrigo Duterte ibabaw sa lubong sa iyang mga ginikanan alas 3:15 kagahapon sa kaadlawon (Mayo 10) didto sa Roman Catholic Cemetery, Barangay 8-A, siyudad sa Davao.
Mibanaw ang luha ni Duterte ilawom sa kabugnaw sa kaadlawon sa lubong sa iyang inahan nga si Soledad "Nanay Soleng" [usa ka public school teacher] ug amahan nga si Governor Vicente Duterte.
Bisan sa lubnganan, gipasalamatan ni Duterte ang iyang mga ginikanan nga usa sa iyang mga nahimong inspirasyon sa iyang kadaugan sa pagka-presidente sa Pilipinas.
Bisan ang mga residente duol sa sementeryo nakahilak sab sa mga gutlo sa kahilom dihang gihalukan ni Duterte ang pantyon sa amahan, mingduko ug naghilak, samtang mingduko sab nga naghilak sa gibutangan sa abo sa iyang inahan.
Una milahos si Duterte sa sementeryo, nahimong halangdon kini nga bisita sa programa sa telebisyon ni Pastor Apollo C. Quiboloy sa Sonshine Media Network International (SMNI).
"I am awed until now. It's destiny. But it's about a fulfillment of a prophecy and that is hard to do, kasi si Pastor binulgar niya na, eh, na ito ang mangyari kasi kung hindi siya nangyari, mapapahiya siya," saysay ni Duterte human nga gidamgo siya ni Quiboloy dise otso na katuig ang milabay.
Atol sa programa sa SMNI, giingon sab ni Duterte nga di siya magpatawag nga presidente, sanglit mas haum sa iyang pandungog ang pagtawag kaniya nga mayor.
Gibutang sab niya ang iyang usa ka sapatos nga gisuot niadtong orasa ibabaw sa lamesa sa programa diin iyang gipakita nga di siya magdugay sa sapatos og iya kining hubuon.
Kahinumdoman sa panahon sa kampanya, nagkatag sa social media ang gipangsuot nga bisti ni Duterte kung anaa siya sa iyang panimalay.
Nakita sab ang pag-moskitero niini sa pagtulog nga sama lamang sa pagpuyo sa usa ka pobre.
"Mahirap man talaga ako, gikan ko sa pobre, mouli sab kong pobre," sulti ni Duterte.
Si Duterte ang labing unang presidente sa kasaysayan sa nasud nga naggikan sa Mindanao. (Jeepy P. Compio)