ANG tipasak sa mga balud maoy nakapapas sa mga letra nga akong gisuwat sa bunbon sa baybayon.
Gitarong pa nako'g suwat aron nindot kining tan-awon ug basahon, apan sa kalit lang napapas kining tanan.
Mipahiyom ko, gumikan dali ra kaayong napapas samtang dugay kaayo akong pagsuwat niadto kay gi-arte-artehan pa man nako sa paghapuhap ang mga kinalis sa akong tudlo.
Dihang panas na, diha sa'y mi-eksena nga umang, milakra iyang mga kinamasan ug inagian sa iyang mga tiil ug balayan; paghapak sa balud, nadala ang umang didto sa tubig.
Akong mga higala nga kauban niadtong among paglulinghayaw sa Isla Reta sa Island Garden City of Samal (Igacos), nalingaw sab sa unahan, nangatawa kay nahimuot nako, nga daw naa koy kaistorya.
Giingnan nako sila nga, nalingaw lang ko uban ang kinaiyahan, nalingaw ko kay gidulaan sa balud akong gisuwat ug ang pag-eksena sa umang.
Ingon nila kamubo lang ba nako'g kalipay, ug gitubag ko sila nga usahay diri nato matugkad ang batasan sa tawo, sila kadtong dali lang matandog sa mga panghitabo, sila kadtong dali lang pahuwason gikan sa kasakit ug sila kadtong mga tawo nga nagtuong kung dunay kangitngit sa panghitabo, naglaum nga modan-ag ang kahayag sa kasulbaran.
Makita ba nato sa atong palibot ang mga tawo nga sama niini? Kanindot unta og naay daghan nga susama niini, kay diha nato matugkad ang higayon nga atong makit-an sa kaugalingon ang espiritu sa pagkamapaubsanon.
Tuod man, miabot ang udtong tutok niadtong mga takna, nagpasilong ko sa landong sa Talisay; bugnaw ang hangin nga mihapuhap sa akong panit, inay mobati kog pagduka, apan akong katulgon gipaabtik sa mga mingaw nga musika nga gipatukar sa radyo sa akong selpon ug miduyog ako.
Sa dapit, nabati nako ang tumang pagpahuway, nga kung mahimo lang, di na mouli, kung mahimo lang ang balay naka-umbaw daplin sa dagat.
Ug kung mamahimo lang, matinuod ang kinatibuk-ang panghitabo sa istorya sa gugma ug pagpaningkamot nga akong gisalmot niadto sa 'Tigi sa pagsuwat sa mubo nga Sugilanong Binisaya' sa tuig 2012 sa University of the Philippines (UP-Mindanao).
Daghan kita'g mga kaagi sa kinabuhi mga higala nga sa kalit lamang di nato malikayan nga subling mabalikan sa atong kasamtangan.
Ang mga tam-is nga panghitabo sa atong kinabuhi, himuon unta natong tulay sa maayong pakigrelasyon sa uban.
Maabtan man kita sa dagkong mga balud sa kasakit, huna-hunaon nato nga ang maong mga balud maoy nagpalig-on kanato gikan sa mga pagsulay sa kinabuhi.