NANGLAYAT. Tungod sa pagka wala sa two party system sama kaniadto nga Liberal Party (LP) ug Nacionalista Party (NP) ra ang partido sa pulitika, ang kadaghanan karon sa mga pulitiko wa nay dugokan kon prinsipyo.
Kaniadto ang pulitiko nga mobalhin og lain nga partido gitawag nga balingbing (usa ka prutas nga aslum og daghan og eskina) o di ba political butterfly, nga sama sa usa ka kabakaba magbalhin-balhin og tongtong sa buwak aron makasiba sa dugos sa buwak.
Di na ikahibung ang taho nga ang giingon nga Visayan bloc nga mga kongresista nga kadaghanan sakop sa LP motapon sa PDP-Laban aron mosuporta sa ambisyon ni Kong. Pantaleon Alvarez sa Davao city, nga magpapiili nga Speaker of the House.
Gitaho nga si Kongresista Alvarez ang gusto sa umaabot nga Pres. Digong Duterte nga maoy mopuli ni Speaker of the House Feliciano Belmonte, Jr., nga usa sa mga haligi sa LP. Bisan pa niini si Belmonte magpapili gihapon nga speaker of the house.
Sukad nga nawala na ang duha lang ka partido de pulitika sa atong sistema bisan ang usa ka dako nga pundok sama sa LP, nga maoy partido sa administrasyon ni Pres. Noynoy Aquino, mokalit lang og balintong kon ang napili nga presidente sama ni Duterte kaatbang sa administrasyon.
Si Davao City Mayor Digong Duterte, nga midaug batok ni Mar Roxas, ang kandidato sa LP sa miaging piliay sa pagka presidente, midagan ubos sa partido PDP-Laban, nga gipanguhan ni Sen. Koko Pimentel.
Tungod sa pagdaug ni Duterte sa pagka presidente, ang PDP-Laban mao na unya ang partido sa administrasyon ni Duterte. Mosugod og opisina si Duterte sa Hulyo 1, ngan ika 16 nga presidente ning atong nasud.
Ang pagtuo man gud sa kadaghanan sa pulitiko nga kon dili sila kaalyado sa administrasyon dili sila mahatagan og mga mehoras alang sa ilang mga distrito. Naanad na man gud ang atong mga kongresista nga sila mopahigayon sa mga proyekto nga ang pundo gikan sa Malakanyang.
Ang gitaho nga milayat ngadto sa PDP-Laban mao si Negros Occidental Kong. Aflredo Benitez ug ang 30 ka sakop niini nga kadaghanan sakop sa LP. Matud pa, kining 31 ka kongresista mipirma na og manifesto sa suporta alang ni Alvarez.
Si Kong. Jerry Treñas sa Iloilo city, nga dumadapig ni Roxas sa miaging piliay, mipirma sa manifesto. Ang uban mao sila si Ormoc City, Leyte LP Kong. Lucy Torres-Gomez, Arthur Defensor Jr. sa Iloilo, Rene Relampagos sa Bohol, Cesar Sarmiento sa Catanduanes, Ben Evardone sa Eastern Samar, Paolo Javier sa Antique, Gerard Gullas sa Cebu ug Richard Garin sa Iloilo.
Samtang sa senado si Senador Pimentel nag-ambisyon usab nga modagan pagka Senate President. Ang kasamtangan nga senate president mao si re-elected Sen. Franklin Drilon.
Apan si Sen. Tito Sotto, nga nasublian pagka senador sa miaging piliay, nag-ambisyon nga modagan pagka senate president. Gidungog usab nga si Alan Cayetano, sa NP, nga napildi nga bise presidente ni Duterte, modagan pagka senate president.
Kon simbako matinuod ang taho nga ang kadaghanan sa kongresista molayat ngadto sa PDP-Laban ug ingon man sa senado, ato ba ning masabot nga way problema unya ang bag-ong presidente nga si Duterte kon unsay iyang buhatong sa iyang panggamhanan?
Kay alyado na man unya ni Presidente Duterte ang kadaghanan sa kongresista ug senador, sa ato pa di na mahitabo nga iyang kandadohan ang kongreso sama sa iyang hulga sa panahon sa kampanya nga iyang kandadohan ang kongreso kon di sila motuman sa iyang gusto.
Ang usa sa mga saad ni Duterte sa iyang kampanya mao ang pagrebisar sa atong Batakang Balaod aron magpederalismo ang atong panggamhanan. Mahitabo ba kaha ni bisan kon ingnon tang pung nga mayoriya na ang iyang mga kongresista? Atong sundan.